OMM Redaksiyası
AnewZ-nin məlumatına görə, İran İslam İnqilabı Keşikçiləri Korpusunun Hərbi Dəniz Qüvvələri bazar günü gecə Hörmüz boğazının cənubunda neft tankerinin mina ilə toqquşduqdan sonra yanmağa başladığını bildirib.
İranın yarırəsmi “Fars” xəbər agentliyinin korpusun Hərbi Dəniz Qüvvələrinin açıqlamasına istinadən yaydığı məlumata görə, gəmi strateji su yolundan çıxmağa çalışarkən partlayış mühərrik bölməsində baş verib.
Açıqlamada iddia olunub ki, tanker səfərin əvvəlindən mövqeləndirmə və naviqasiya sistemlərini söndürüb, həmçinin Tehran tərəfindən icazəsiz sayılan cənub marşrutu ilə hərəkət etməyə cəhd göstərib. Korpusun Hərbi Dəniz Qüvvələri gəmini boğazdan keçidi tənzimləyən dəniz qaydalarını pozmaqda ittiham edib.
Qurum xəbərdarlıq edib ki, Hörmüz boğazında və Fars körfəzində naviqasiya və identifikasiya sistemləri söndürülmüş vəziyyətdə hərəkət edən gəmilərə qarşı qəti tədbir görüləcək.
Səudiyyə Ərəbistanının Mülki Müdafiə Xidməti Cizan şəhərində təhlükənin sovuşduğunu açıqlayıb. Bu məlumat sakinlərə mümkün təhlükə barədə xəbərdarlıq edildikdən yeddi dəqiqə sonra yayılıb.
Qurum sakinləri Mülki Müdafiə Xidmətinin göstərişlərinə əməl etməyə, insanların toplaşmasından və çəkiliş aparmaqdan çəkinməyə çağırıb. Təcili vəziyyətdə 998 nömrəsinə zəng etmək tövsiyə olunub.
