Azərbaycanda hərbi xidmətə könüllü qəbul qaydaları və namizədlərə dair tələblər yenilənir.
"Operativ Məlumat Mərkəzi-OMM" xəbər verir ki, bununla bağlı "Hərbi xidmətkeçmə haqqında" Əsasnaməyə mühüm dəyişikliklər təklif edilir.
Müvafiq qanun layihəsi parlamentin Gənclər və idman komitəsinin iclasında müzakirə olunub.
Layihəyə əsasən, müddətdən artıq həqiqi hərbi xidmətə qəbul zamanı aşağıdakı kateqoriyalar nəzərdə tutulur:
Namizədlər ən azı ümumi orta təhsilli olmalı, müddətli həqiqi hərbi xidməti başa çatdırmalıdırlar. Həmçinin, 40 yaşınadək hərbi vəzifəlilər (zabitlər və gizirlər istisna olmaqla) və 19 yaşından 40 yaşınadək qadınlar xidmətə qəbul edilə bilərlər.
Mövcud qanunvericilikdə isə bu şərtlər əsasən əsgər, matros və çavuşların müddətdən artıq xidmətinə şamil edilirdi.
Əsasnaməyə təklif edilən yeniliyə görə, xüsusi təyinatlı ali təhsil müəssisələrinə qəbul edilən 18 yaşı tamam olmayan şəxslərlə müqavilə yalnız onların qanuni nümayəndələrinin (valideyn və ya himayəçinin) yazılı razılığı ilə bağlanılacaq.
Bundan əlavə, xüsusi təyinatlı təhsil ocaqlarını bitirib ilk zabit hərbi rütbəsi alan vətəndaşlar, eləcə də 35 yaşınadək həqiqi hərbi xidmətdə olan hərbi qulluqçular birbaşa kadr zabit heyətinə keçiriləcəklər.
