Afət Ziyadqızı
Türkiyə Respublikasının xarici işlər naziri Hakan Fidan macarıstanlı həmkarı Anita Orban (Anita Orbán) ilə keçirilən birgə mətbuat konfransında regional təhlükəsizlik və ikitərəfli əməkdaşlıq məsələlərinə dair mühüm bəyanatlarla çıxış edib.
"Operativ Məlumat Mərkəzi-OMM" xəbər verir ki, Rusiya-Ukrayna münaqişəsinin regional təsirindən bəhs edən Hakan Fidan Qara dəniz hövzəsində sabitliyin qorunmasının vacibliyini vurğulayıb.
Türkiyəli diplomat Qara dənizin yeni hərbi qarşıdurma və münaqişə meydanına çevrilməsinə heç bir halda yol verilməməli olduğunu bəyan edib.
Məkkə təhlükəsizlik razılaşmasına toxunan nazir sənədin müdafiə xarakteri daşıdığını diqqətə çatdırıb. Hakan Fidan bildirib ki, sazişə əsasən, tərəfdaş ölkələrdən biri təcavüzə məruz qalacağı təqdirdə ona müvafiq müdafiə dəstəyi göstəriləcək: “Bu, hücum xarakterli müqavilə deyildir. Türkiyə başqa bir dövlətin suveren ərazisinə qoşun yeridərək oradan hücum əməliyyatları həyata keçirmək niyyətində deyil”.
Türkiyə XİN rəhbəri, həmçinin razılaşmanın təsdiqlənməsi üçün Böyük Millət Məclisinə (parlamentə) təqdim olunması istiqamətində bütün hüquqi və inzibati hazırlıq işlərinin yekunlaşdığını əlavə edib.
