Balkan ölkələri Sloveniya, Xorvatiya, Bosniya və Herseqovina, Serbiya və Monteneqroda leysan yağış, və külək həyata mənfi təsir edir.

"Operativ Məlumat Mərkəzi-OMM" xəbər verir ki, bu barədə xarici KİV məlumat yayıb.

Sloveniyada dünəndən başlayan leysan yağış və dolu nəticəsində bəzi evlər, iş yerləri və nəqliyyat vasitələrinə ziyan dəyib.

Bu gün səhər saatlarında Xorvatiyanın şərqində artan leysan yağışının ardınca Bosnjaci kəndində bir evə düşən ildırım yanğınla nəticələnib. Xorvatiya baş naziri Andrey Plenkoviç yerli mətbuata verdiyi açıqlamada kənddəki 1000 evdən 900-nün damının güclü külək nəticəsində zədələndiyini bildirib.

Qeyd olunub ki, Xorvatiyanın Brod-Posavina bölgəsində güclü külək nəticəsində çoxlu ev və iş yerləri dağılıb.

Mavritaniyanın cənub-qərb sahillərində qayıq qəzası nəticəsində 87 miqrant həlak olub.

"Operativ Məlumat Mərkəzi-OMM" xəbər verir ki, bu barədə "Əl Akhbar" informasiya portalı məlumat yayıb.

Məlumata görə, əksəriyyəti Seneqal və Qambiyadan olan miqrantların meyitləri sahil mühafizəsi əməkdaşları tərəfindən Ndiaqo şəhəri yaxınlığındakı sularda aşkar edilib.

Qayıqda olan 184 nəfərdən 36-ı xilas edilib, onlarla insan itkin düşmüş hesab olunur.

Qərbi Afrika ölkələrinin sahillərindən qeyri-qanuni miqrantları Avropaya keçirmək cəhdləri adi hala çevrilib. Yararsız qayıqlarda tez-tez qəza halları müşahidə olunur ki, bu da onlarla miqrantın həyatını itirməsi ilə nəticələnir.

Türkiyə və Belarus dövlət başçıları Rəcəb Tayyib Ərdoğan və Aleksandr Lukaşenko Astanada keçirilən ŞƏT sammiti çərçivəsində Rusiya-Ukrayna böhranının nizamlanmasını müzakirə ediblər.

"Operativ Məlumat Mərkəzi-OMM" bu barədə Türkiyə Prezidentinin mətbuat xidmətinə istinadən xəbər verir.

Məlumata görə, iki ölkə liderləri Ankara və Minsk arasında ikitərəfli gündəliyi, Ukraynadakı müharibənin nəticələrini, eləcə də aktual regional və qlobal problemləri müzakirə ediblər.

Türkiyə Prezidenti Rusiya ilə Ukrayna arasında müharibəyə son qoymağa yönəlmiş addımların vacibliyini vurğulayıb.

Ərdoğan bildirib ki, Türkiyə sülh üçün səylərini və hər iki tərəflə səmimi əlaqələri davam etdirəcək.

Daha əvvəl Belarus Prezidentinin mətbuat xidməti Türkiyə dövlət başçısı ilə danışıqlar barədə məlumat yayıb, lakin iki lider arasında söhbətin təfərrüatları verilməyib.

Türkiyə terrorla mübarizədə Şanxay Əməkdaşlıq Təşkilatı (ŞƏT) ilə əməkdaşlığı gücləndirməyə hazırdır.

"Operativ Məlumat Mərkəzi-OMM" xəbər verir ki, bunu Türkiyə Prezidenti Rəcəb Tayyib Ərdoğan Qazaxıstanın paytaxtı Astana şəhərində “ŞƏT plyus” formatında keçirilən görüşdə çıxışı zamanı deyib.

O qeyd edib ki, beynəlxalq nizamın üz-üzə qaldığı ciddi problemlərə qarşı səsini çıxaran ölkələrdən biri də Türkiyədir:

"Türkiyə güclünün haqlı deyil, haqlının güclü olduğu, bununla yanaşı, sülh, təhlükəsizlik, rifah yaradan beynəlxalq sistemin inşası üçün çalışır. Məqsədimiz regionda və ondan kənarda sülhü təsis etməkdir. Onminlərlə vətəndaşını terrora qurban vermiş Türkiyə terrorun qanlı üzünü çox yaxşı tanıyır. 40 ildir terrorla mübarizə aparırıq və aparmağa da davam edəcəyik. Bu çərçivədə ŞƏT-lə dialoqu gücləndirməyə hazırıq".

Prezident Türkiyənin milyonlarla qaçqına qucaq açmasına da diqqət çəkib:

"Türkiyə olaraq müvəqqəti mühafizə altındakı suriyalılar da daxil olmaqla, 4 milyondan çox insana qucaq açmışıq. Humanitar yardım bu kimi sözügedən problemlərlə mübarizədə böyük rol oynayır".

2023-cü il oktyabrın 7-dən etibarən Qəzza zolağında ölən fələstinlilərin sayı 38 011 nəfərə yüksəlib.

"Operativ Məlumat Mərkəzi-OMM" xəbər verir ki, bu barədə Qəzzanın Səhiyyə Nazirliyi məlumat yayıb.

Bu dövr ərzində ümumilikdə 87 445 nəfər yaralanıb.

Məlumata görə, son 24 saat ərzində 58 nəfər ölüb, 179 nəfər yaralanıb.

Türkiyənin Berlindəki səfiri Almaniya Xarici İşlər Nazirliyinə (XİN) çağırılıb.

"Operativ Məlumat Mərkəzi-OMM" xəbər verir ki, bu barədə "Der Spiegel" jurnalı Almaniya XİN-in nümayəndəsinə istinadən məlumat yayıb.

Bildirilib ki, səfir Türkiyə yığmasının üzvü Merih Demiralın Almaniyada keçirilən Avropa çempionatının 1/8 finalının Avstriya millisi ilə matçında “bozqurd” işarəsi göstərməsinə görə çağırılıb.