Afət Ziyadqızı
Ermənistan Konstitusiya Məhkəməsi parlamentdəki müxalif “Ermənistan” və “Güclü Ermənistan” fraksiyalarının hökumət proqramında Erməni Apostol Kilsəsinə aid müddəaların konstitusiyaya uyğunluğunun yoxlanılması ilə bağlı müraciətini icraata götürməkdən imtina edib.
"Operativ Məlumat Mərkəzi-OMM" xəbər verir ki, müxalifət fraksiyaları Milli Məclisin 25 avqust 2026-cı il tarixli AJO-3-N saylı qərarı ilə təsdiqlənmiş hökumət proqramını mübahisələndirməyə cəhd ediblər.
Onlar sənəddə dövlətin kilsənin daxili işlərinə müdaxiləsinin nəzərdə tutulduğunu, bunun isə ölkə Konstitusiyasına, Avropa İnsan Hüquqları Konvensiyasının 9-cu maddəsinə və Venesiya Komissiyasının kilsə ilə dövlətin ayrılığı prinsipinə zidd olduğunu iddia ediblər.
Konstitusiya Məhkəməsi isə prosessual qərar qəbul edərək iddiaya baxmaqdan boyun qaçırıb. Məhkəmənin əsaslandırmasında qeyd olunub ki, hökumət proqramının siyasi baxımdan məqsədəuyğunluğu konstitusiya ədalət mühakiməsinin predmeti deyil, birbaşa parlamentin siyasi məsuliyyət dərəcəsinə daxildir.
Qərarda vurğulanıb ki, Məhkəmə özünüməhdudlaşdırma prinsipinə sadiqdir və siyasi fikir ayrılıqları olan məsələlərdə dövlət hakimiyyəti orqanlarının fəaliyyətinə müdaxilə etməməlidir. Həmçinin bildirilib ki, müraciət edən tərəf konstitusiya-hüquqi pozuntunun mahiyyəti üzrə zəruri hüquqi əsaslandırmaları təqdim edə bilməyib və abstrakt konstitusiya nəzarəti mexanizmindən siyasi tənqid vasitəsi kimi istifadə olunmamalıdır.
