Emil Səfərov: “Penalti qərarından sonra psixoloji olaraq çökdüm”

Azərbaycan millisinin futbolçusu Emil Səfərov UEFA Millətlər Liqasının birinci turunda Litva ilə keçirilən oyunda penaltiyə səbəb olan epizodu şərh edib.

O, səfərdə qazanmaq istədiklərini, lakin matçın asan keçmədiyini bildirib. Səfərovun sözlərinə görə, həmin epizodda penalti təyin olunmamalı idi: “Orada milyon faiz penalti yox idi. Əgər orada penalti var idisə, mən futbolu buraxaram. Epizoda VAR-da niyə baxılmadı bilmirəm. Hakim mənə dedi ki, rəqibi formasından dartmısan. Halbuki o, mənim ayağımı tapdalayıb”.

Millinin üzvü penalti qərarından sonra psixoloji baxımdan çətinlik çəkdiyini deyib: “Penalti qərarından sonra psixoloji olaraq çökdüm. Əslində qayda pozuntusunu rəqib etmişdi. Özümü çox pis hiss edirdim”.

Səfərov fasilədə baş məşqçi Ayxan Abbasovun qırmızı vərəqə almağından ehtiyat etdiyini söylədiyini və buna görə əvəzləndiyini qeyd edib. Futbolçu dəyişdirilməsinin sosial şəbəkələrdə yayılan görüntü ilə əlaqəli olmadığını vurğulayıb.

Litva – Azərbaycan qarşılaşması 1:1 hesabı ilə başa çatıb. Azərbaycan millisinin qolunu 14-cü dəqiqədə Mahir Emreli vurub.