ABŞ Dövlət Departamentinin keçmiş müavini və Tehranla nüvə sazişi üzrə danışıqlar qrupunun sabiq rəhbəri Vendi Şerman İranın son hərbi qarşıdurmaların yekununda ABŞ ilə müqayisədə daha güclü mövqe əldə etdiyini bildirib.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Şermanın sözlərinə görə, İranın Hörmüz boğazına nəzarət etməsi ona mühüm strateji üstünlük qazandırır.
“Danışıqların olması, ümumiyyətlə olmamasından daha yaxşıdır. İran şübhəsiz ki, özünə daha güclü mövqe təmin edib. Onlar istənilən vaxt Hörmüz boğazını bağlaya bilərlər”, - o bildirib.
Keçmiş amerikalı diplomat hesab edir ki, əldə olunan bu üstünlük İrana Livanda sülh şərtlərinin müəyyən edilməsində daha fəal rol oynamaq imkanı verir. Bununla belə, o, İranı münaqişənin qalibi adlandırmaqdan yayınıb.
Şerman qeyd edib ki, İran davamlılığını nümayiş etdirərək güc yolu ilə sındırıla bilməyəcəyini sübut edib. Onun fikrincə, bu vəziyyət diplomatiyanın əhəmiyyətini və hərbi əməliyyatların davam etdirilməsinin faydasız olduğunu göstərir.
Xatırladaq ki, Vaşinqton və Tehran iyunda bütün cəbhələrdə, o cümlədən Livanda hərbi əməliyyatların dərhal dayandırılmasını nəzərdə tutan qarşılıqlı anlaşma memorandumu imzalayıblar.
