“Bu gün layiq olduğumuz qələbəni əldə etdik”.
"Operativ Məlumat Mərkəzi-OMM" xəbər verir ki, bu sözləri Xorvatiyanın “Dinamo” klubunun baş məşqçisi Sergey Yakiroviç UEFA Çempionlar Liqasının pley-off mərhələsində Bakıda “Qarabağ”a 2:0 hesabı ilə qalib gəldikləri cavab görüşündən sonra təşkil olunan mətbuat konfransında deyib.
Mütəxəssis uğurlu nəticə münasibətilə futbolçularını təbrik edib: “Qarabağ”ı çox yaxşı analiz etdik. Müdafiəni yaxşı qura bildik. Bunun nəticəsində qələbə qazandıq. Amma müəyyən çatışmazlıqların da olduğunun fərqinə vardıq. Bütün bunlara baxmayaraq, gözəl və keyfiyyətli oyun nümayiş etdirdik”.
Qeyd edək ki, ilk görüşdə də 3:0 hesabı ilə qalib gələn xorvatiyalılar turnirin liqa mərhələsinə vəsiqə qazanıblar. “Qarabağ” isə yoluna Avropa Liqasının liqa mərhələsində davam edəcək.
