ABŞ-nin keçmiş prezidenti Co Bayden ölkə tarixində liderlər arasında ən böyük dövlət təqaüdü alan şəxs olub.
"Operativ Məlumat Mərkəzi-OMM" xəbər verir ki, bu barədə “New York Post” ABŞ Vergi Ödəyiciləri Fondunun vitse-prezidenti Damian Brediyə istinadən məlumat yayıb.
Məlumata görə, Baydenin illik dövlət təqaüdü 417 min dollar təşkil edir ki, bu da onun prezidentlik dövründə aldığı maaşdan 17 min dollar çoxdur.
2026-cı maliyyə ili üçün isə keçmiş prezidentə ümumilikdə 1,5 milyon dollardan artıq vəsait ayrılıb. Bu məbləğin 727 min dolları Baydenin ofis sahəsinin icarə xərclərinə yönəldiləcək.
Damian Bredi bildirib ki, Baydenin senatorluqdan vitse-prezidentliyə, daha sonra isə prezidentliyə qədər uzanan siyasi karyerası ona müxtəlif pensiya fondlarından eyni vaxtda ödəniş almağa imkan verib. Onun sözlərinə görə, bu hal mövcud sistemdəki “boşluqlardan” istifadə nəticəsində mümkün olub.
