Azərbaycanın xarici işlər naziri Ceyhun Bayramov ilə Avropa İttifaqının (Aİ) xarici işlər və təhlükəsizlik siyasəti üzrə ali nümayəndəsi Kaya Kallas arasında mühüm telefon danışığı baş tutub.
Xarici İşlər Nazirliyinin “Operativ Məlumat Mərkəzi-OMM”-ə verdiyi məlumatına əsasən, tərəflər bölgədəki son vəziyyəti müzakirə ediblər.
Müzakirələrin mərkəzində bölgədə artmaqda olan hərbi gərginlik və eskalasiya nəticəsində yaranmış təhlükəsizlik vəziyyəti dayanıb. Tərəflər mövcud durumdan ciddi narahatlıq ifadə edərək, münaqişənin yalnız diplomatik yollarla həllinin vacibliyini xüsusi vurğulayıblar.
Söhbət zamanı Avropa İttifaqı vətəndaşları da daxil olmaqla, xarici ölkə vətəndaşlarının İrandan təxliyəsində Azərbaycanın oynadığı strateji rol yüksək qiymətləndirilib. Tərəflər, həmçinin qarşılıqlı maraq doğuran digər məsələlər ətrafında fikir mübadiləsi aparıblar.
