Afət Ziyadqızı
“Mançester Yunayted” Ceydon Sanço ilə yollarını ayırmağa hazırlaşır”.
“Operativ Məlumat Mərkəzi-OMM” xəbər verir ki, “qırmızı şeytanlar” cari icarə müddəti başa çatdıqdan sonra 25 yaşlı futbolçunun sərbəst transferlə ayrılmasına icazə verməyə hazırdır.
Bildirilir ki, klub rəhbərliyi bir neçə mövsüm davam edən qeyri-müəyyənlik və “Old Trafford”dan ardıcıl icarə keçidlərindən sonra oyunçuya yeni müqavilə təklif etməmək qərarına gəlib.
“Mançester Yunayted” Sançonu 2021-ci ildə Dortmund “Borussiya”sından 85 milyon avroya transfer etmiş və onunla həftəlik 300 min funt sterlinq qazandıran beş illik müqavilə imzalamışdı. Həmin dövrdə transfer klubun iddialı addımı kimi qiymətləndirilirdi.
Lakin futbolçunun İngiltərə karyerası qeyri-sabit çıxışlar, məşqçi dəyişiklikləri və meydandan kənar problemlərlə yadda qalıb. O, icarə əsasında yenidən “Borussiya Dortmund”da, daha sonra isə “Çelsi” və “Aston Villa”da çıxış edib.
Cari mövsümdə “Aston Villa”nın heyətində 25 oyunda cəmi bir qol vuran Sanço sabit və məhsuldar oyun sərgiləməkdə çətinlik çəkib. Texniki keyfiyyətinə baxmayaraq, Bundesliqadakı parlaq performansını İngiltərədə davam etdirə bilməyib.
