Praqa və Bratislava enerji sektorunda əməkdaşlığı aktivləşdirmək niyyətindədirlər.
"Operativ Məlumat Mərkəzi-OMM" xəbər verir ki, bu barədə Çexiya və Slovakiyanın baş nazirləri Petr Fiala və Robert Fitsonun danışıqlarının yekunları üzrə birgə mətbuat konfransında bildirilib.
“Biz enerji sektorunda əməkdaşlığın perspektivlərini müzakirə etdik. Hər iki ölkə nüvə enerjisi sektorunu inkişaf etdirmək niyyətindədir”, – Fiala deyib.
O qeyd edib ki, Praqa və Bratislava elektrik enerjisinin Avropa İttifaqının (Aİ) ərazisindən tranzitinin təmin edilməsində əməkdaşlıq edə bilərlər.
Fitso isə birgə enerji layihələrinin prioritetliyini təsdiqləyib. Bratislava və Praqa, onun sözlərinə görə, atom elektrik stansiyalarında yeni enerji bloklarının tikintisi və kiçik nüvə modul reaktorlarının quraşdırılması planlarını həyata keçirmək üçün birlikdə işləyə bilərlər.
Hökumət başçılarının fikrincə, yüksəksürətli dəmir yolu və avtomagistralların yaradılmasında tərəflər üçün əhəmiyyətli perspektivlər açılır. Birgə layihələrin başlanması 2026-cı ilə planlaşdırılır.
Çexiya və Slovakiya, baş nazirlərin qeyd etdiyi kimi, müdafiə və təhlükəsizlik sahələrində uğurla əməkdaşlıq edirlər. Slovakiya ərazisində NATO-nun bazasında 400-dən çox Çexiya hərbçisi var. Çexiya Hərbi Hava Qüvvələri Slovakiyanın hava məkanının qorunmasında iştirak edir. Ölkələr müdafiə sənayesi, eləcə də silahların tədarükü sahəsində əməkdaşlığı genişləndirmək istəyirlər.
Mətbuat konfransında deyildiyi kimi, Praqa və Bratislava qeyri-qanuni miqrasiyaya qarşı mübarizədə əməkdaşlıq edir və Aİ-nin xarici sərhədlərinin möhkəmləndirilməsinin tərəfdarıdırlar. Fiala və Fitso hökumətlərarası məsləhətləşmələr ənənəsini davam etdirmək niyyətində olduqlarını vurğulayıblar. Çexiya 2024-cü ilin yazında hər iki respublikanın hökumətlərinin birgə iclasını təşkil edəcək.
Fitso Fialanı Slovakiyaya səfərə dəvət edib.
