BMT Livanda gərginliyin dərhal azaldılmasına çağırış edib.
“Operativ Məlumat Mərkəzi-OMM” xəbər verir ki, bu barədə BMT-nin sözçüsü Stefan Düjarrik Nyu-Yorkda jurnalistlər üçün keçirilən brifinqdə bildirib.
Onun sözlərinə görə, İsrailin məcburi köçkünlük əmrləri nəticəsində yüz minlərlə insan təsirlənib. Dujarrik qeyd edib ki, Litani çayının cənubundakı ərazilərin, Baalbek qubernatorluğunun və Bekaa vadisinin bir hissəsinin, eləcə də Beyrut şəhərinin cənub ətrafının böyük hissəsinin demək olar ki, bütün əhalisi hazırda döyüş zonasındadır.
BMT rəsmisi bildirib ki, təkcə son bir həftə ərzində 660 mindən çox insan məcburi köçkün kimi qeydiyyata alınıb. Onun sözlərinə görə, bölgədəki tibb müəssisələri ciddi gərginlik altında fəaliyyət göstərir və xroniki xəstəlikləri olan köçkünlər lazımi müalicəni ala bilmirlər.
Dujarrik əlavə edib ki, tibb müəssisələrinə hücumlar da davam edir. O qeyd edib ki, İsrailin Qırmızı Xaçın təcili yardım avtomobilinə hücumu nəticəsində tibb işçiləri yaralanıb və nəqliyyat vasitəsinə ziyan dəyib.
Bundan başqa, "World Health Organization" tərəfdaşlarının məlumatına görə, martın 2-dən bu yana tibb müəssisələrinə 23 hücum qeydə alınıb. Nəticədə 14 nəfər ölüb, 26 nəfər isə yaralanıb.
BMT sözçüsü bildirib ki, təşkilat tərəfdaşları ilə birlikdə Livanda humanitar yardımın həcmini artırır. Onun sözlərinə görə, son günlər köçkün ailələrə yüz minlərlə isti yemək, eləcə də minlərlə döşək və yorğan paylanıb.
“Biz təcili olaraq gərginliyin azaldılmasına ehtiyac olduğunu bir daha vurğulayırıq. Bütün tərəflər beynəlxalq humanitar hüquqa riayət etməli, mülki şəxsləri və mülki infrastrukturu, o cümlədən tibb müəssisələrini qorumalıdır”, – deyə Stefan Düjarrik bildirib.
Livan hökumətinin məlumatına görə, münaqişənin başlanmasından bəri ölkədə təxminən 760 min nəfər məcburi köçkün kimi qeydiyyata alınıb.
