Konfrans Liqasının 3-cü təsnifat mərhələsində bu gün keçiriləcək "Beşiktaş" - "Neftçi" oyununun saatı dəyişdirilməyib.
"Operativ Məlumat Mərkəzi-OMM" xəbər verir ki, bunu "Neftçi"nin mətbuat xidmətinin rəhbəri Rüstəm Allahverdiyev bildirib. O, əslində görüşün əvvəldən saat 22:00-a təyin olunduğunu, UEFA-nın səhvə yol verərək oyunun vaxtını 21:00 qeyd etdiyini bildirib:
"Əslində saat dəyişdirilməyib. "Beşiktaş"dan da bildirilib ki, görüş saat 22:00-dadır (Bakı vaxtı ilə). Sadəcə olaraq UEFA-nın səhvi olub, saytlarında 21:00 (Bakı vaxtı ilə) göstərilib. Elə dünən "Beşiktaş" nümayəndələri bizim yanımızda UEFA-ya zəng etməyə çalışırdılar ki, səhv düzəldilsin. "Beşiktaş" azarkeşləri ilə bağlı da problem yaranmayacaq. Çünki "Beşiktaş" azarkeşləri əvvəlcədən matçın düzgün saatını bilirdilər".
09:48***
"Neftçi"nin Türkiyədə "Beşiktaş"a qarşı keçirəcəyi UEFA Konfrans Liqasının III təsnifat mərhələsinin cavab oyununun başlama saatı dəyişdirilib.
"Operativ Məlumat Mərkəzi-OMM" xəbər verir ki, qarşılaşma əvvəlcədən nəzərdə tutulduğu kimi Bakı vaxtı ilə 21:00-da yox, 22:00-da start götürəcək.
Bunun hansı səbəbdən baş verdiyi hələlik məlum deyil.
Qeyd edək ki, "Neftçi Arena"dakı ilk matçda Azərbaycan təmsilçisi 1:3 hesabı ilə məğlub olub.
