Baş Mütəşəkkil Cinayətkarlıqla Mübarizə İdarəsinin paytaxtda keçirdiyi əməliyyatlarla saxlanılan 3 nəfərdən 24 kiloqram narkotik vasitə aşkarlanıb.

Bu barədə "Operativ Məlumat Mərkəzi-OMM"-ə Daxili İşlər Nazirliyinin Mətbuat xidmətindən məlumat verilib.

Bildirilib ki, İdarənin əməkdaşları paytaxt ərazisində narkotiklərin qanunsuz dövriyyəsi və satışı ilə məşğul olan şəxslərə qarşı əməliyyatlar keçirib. Tədbirlərlə 1988-ci il təvəllüdlü Aqşin Əmirov, 1986-cı il təvəllüdlü Aida Nəbiyeva və 1979-cu il təvəllüdlü Ramil Axundov saxlanılıblar.

Qeyd edilib ki, onlardan ümumilikdə 24 kiloqram, o cümlədən 20 kiloqram psixotrop maddə metamfetamin və 4 kiloqram marixuana aşkarlanıb. A.Əmirov, A.Nəbiyeva və R.Axundov sosial şəbəkələrdə tanıdıqları şəxsiyyətləri istintaqla araşdırılan İran vətəndaşları vasitəsilə narkotikləri əvvəlcədən müəyyənləşdirilən yerlərdən götürərək maddi qazanc müqabilində ayrı-ayrı ünvanlara çatdırmağı planlaşdırıblar.

"Faktlarla bağlı cinayət işləri başlanılıb, saxlanılan şəxslər barəsində məhkəmənin qərarı ilə həbs qətimkan tədbiri seçilib", - deyə bildirilib.

Goranboy rayonunda məktəbdə bıçaqlanma hadisəsi olub.

"Operativ Məlumat Mərkəzi-OMM" xəbər verir ki, hadisə Səfikürd kənd tam orta məktəbində qeydə alınıb.

Məktəblilər arasında olan mübahisə bıçaqlanma ilə nəticələnib.

Daxili İşlər Nazirliyinin Mətbuat Xidmətinin Gəncə Regional qrupundan "Report"un sorğusuna cavab olaraq bildirilib ki, Goranboy Rayon Polis Şöbəsinə 2007-ci il təvəllüdlü A.Həsənəliyevin ayaq nahiyəsinin kəsici-deşici alətlə daxilə keçməyən xəsarət alması barədə məlumat daxil olub.

Araşdırmalar zamanı hadisəni 2007-ci il təvəllüdlü R.Musayevin törətməsi məlum olub.

Faktla bağlı araşdırmalar davam etdirilir.

24 saylı Nizami birinci və 23 saylı Nəsimi-Səbail seçki dairələrinin bəzi məntəqələrində seçki nəticələri ləğv edilib.

"Operativ Məlumat Mərkəzi-OMM" xəbər verir ki, bu barədə Komissiyanın bu gün keçirilən iclasında məlumat verilib.

Qeyd olunub ki, 24 saylı Nizami birinci dairəsindən namizəd Şükürova Ülviyyə seçki məntəqələrində qanun pozuntularının olması ilə bağlı MSK-ya müraciət edərək səsvermə nəticələrinin ləğvini tələb edib.

Müraciət MSK ekspert qrupunun üzvləri tərəfindən araşdırılıb. Namizəd səsvermə günü səsvermə prosesinin qanunvericiliyə uyğun aparılmadığını iddia edib. İddia edilən pozuntularla əlaqədar 24 saylı Nizami seçki dairəsinin komissiyası tərəfindən araşdırılıb və iddianın əsassız olduğu bildirilib.

MSK-nın ekspert qrupu tərəfindən aparılan Araşdırma zamanı isə 4, 6, 28, 31 və 33 saylı məntəqələrində səsvermə nəticələrinə təsir edə biləcək pozuntular aşkar edilib. Qeyd edilən seçki məntəqələrində səsvermə nəticələri ləğv edilib və Ülviyyə Şükürovanın müraciəti qismən təmin edilib. Təklif səsə qoyularaq qəbul edilib. 

23 saylı Nəsimi-Səbail seçki dairəsindən namizəd Əziz Əzizov seçki məntəqələrində qanun pozuntularının olması ilə bağlı MSK-ya müraciət edib. 

Müraciətçi sözügedən dairənin bir sıra məntəqələrində qanun pozuntularının olmasını iddia edib və səsvermə nəticələrinin ləğvini tələb edib. Müraciət MSK ekspert qrupunun üzvləri tərəfindən araşdırılıb. Namizəd səsvermə günü səsvermə prosesinin qanunvericiliyə uyğun aparılmadığını iddia edib.

Əziz Əzizov sözügedən dairənin 10 məntəqəsində pozuntuların olduğunu bildirib. Lakin MSK ekspert qrupu tərəfindən aparılan araşdırma zamanı sadəcə 17 saylı seçki məntəqəsində müraciətə uyğun pozuntuların olduğunu təsdiqlənib. Dairə seçki komissiyası tərəfindən Əziz Əzizovun müraciəti qismən təmin edilib və sözügedən məntəqə üzrə səsvermə nəticələri etibarsız hesab edilib. Təklif səsə qoyularaq qəbul edilib.

Müdafiə Nazirliyinin N saylı hərbi hissəsinin hərbi qulluqçusu, əsgər Bağırov Nurbala Asif oğlunun odlu silahdan açılmış atəş nəticəsində ölməsi barədə Şəmkir hərbi prokurorluğuna məlumat daxil olub.

Bunu "Operativ Məlumat Mərkəzi-OMM"-ə hərbi prokurorun böyük köməkçisi - Hərbi Prokurorluğun Mətbuat xidmətinin rəhbəri, baş ədliyyə müşaviri Firad Əliyev deyib.

Məlumata görə, daxil olmuş məlumat əsasında Şəmkir hərbi prokurorluğunun və Azərbaycan Respublikası Hərbi Prokurorluğunun Kriminalistika və İnformasiya Texnologiyaları idarəsinin əməkdaşları tərəfindən hadisə yerinə və meyitə baxış keçirilib, iş üçün əhəmiyyət kəsb edən predmetlər maddi sübut kimi götürülüb və digər hərəkətlər icra edilib.

Fakt üzrə Şəmkir hərbi prokurorluğunda Azərbaycan Respublikası Cinayət Məcəlləsinin 120.1-ci (Qəsdən adam öldürmə) maddəsi ilə cinayət işi başlanılaraq şahidlər dindirilmiş, müxtəlif ekspertizalar təyin edilərək, icraya yönəldilmiş və təxirəsalınmaz zəruri istintaq hərəkətləri həyata keçirilib.

"Hazırda istintaq davam etdirilir və qanunvericiliyin tələblərinə uyğun olaraq bütün tədbirlərin görülməsi, o cümlədən hər bir əmələ və fakta hüquqi qiymət verilməsi təmin olunacaq", - məlumatda deyilir.

Gəncədə 18 yaşlı qadının bıçaqlanmasının təfərrüatları məlum olub.

"Operativ Məlumat Mərkəzi-OMM" APA-ya istinadən xəbər verir ki, şəhər sakini A.Əmiraslanovanı bıçaqlayan M.Ə. onunla qeyri-rəsmi nikahda olan yeniyetmədir.

Belə ki, hadisə şəhərin “Qaraçılar məhəlləsi” kimi tanınan ərazisində baş verib. Orada yaşayan A. Əmiraslanova və 2009-cu il təvəllüdlü M.Ə. qeyri-rəsmi nikahda olub. Sonra A.Əmiraslanova sevgilisindən ayrılaraq başqa şəxslə ailə həyatı qurub. M.Ə.-nin onu başqa şəxslə evləndiyinə görə bıçaqladığı bildirilir.

Bakı şəhərində yerləşən “Kamandar Nəsibov və partnyorları” vəkil bürosunun vəkili Rzayev Babək Vahid oğlunun qanunsuz əməlləri barədə toplanmış materiallar əsasında Naxçıvan Muxtar Respublikası Prokurorluğunda cinayət işi başlanıb.

"Operativ Məlumat Mərkəzi-OMM" xəbər verir ki, bu barədə Azərbaycan Respublikasının Baş Prokurorluğu ilə Vəkillər Kollegiyasının birgə məlumatında bildirilib.

Qeyd edilib ki, istintaq tədbirləri ilə vəkil Babək Rzayevin muxtar respublikada müvafiq məhkəmənin icraatında olan cinayət işi üzrə özünün həqiqi və ya güman edilən təsir imkanlarından istifadə edərək müvafiq vəzifəli şəxsin qərarına təsir etmək imkanına malik olmasını vətəndaşlara bildirməklə 2024-cü ilin iyun ayı ərzində müxtəlif məbləğlərdə müqavilədən kənar pul vəsaitini tələb edib almasına əsaslı şübhələr əldə edilib.

İş üzrə toplanmış sübutlar əsasında Babək Rzayev Azərbaycan Respublikası Cinayət Məcəlləsinin 312-1.1-ci (vəzifəli şəxsin qərarına qanunsuz təsir göstərmə - nüfuz alveri) maddəsi ilə təqsirləndirilən şəxs qismində cəlb edilməklə barəsində müstəntiqin vəsatəti, ibtidai araşdırmaya prosessual rəhbərliyi həyata keçirən prokurorun təqdimatı əsasında məhkəmənin qərarı ilə həbs qətimkan tədbiri seçilib.

Həmçinin, Vəkillər Kollegiyası tərəfindən vəkil barəsində qanunvericilikdə nəzərdə tutulmuş qaydada araşdırma aparılır və onun davranışına hüquqi qiymət veriləcək.

Hazırda cinayət işi üzrə əhəmiyyət kəsb edən halların, cinayətin törədilməsində hər hansı şəkildə iştirak etmiş digər şəxslərin müəyyənləşdirilməsi istiqamətində istintaq tədbirlərinin həyata keçirilməsi davam etdirilir.