Azərbaycan Mərkəzi Bankı (AMB) 10 fiziki şəxsə və 1 hüquqi şəxsə sığorta agenti fəaliyyətinə verdiyi lisenziyaları ləğv edib.

Bu barədə "Operativ Məlumat Mərkəzi-OMM"-ə tənzimləyici qurumdan bildirilib.

Məlumata görə, bununla bağlı qərar aprelin 4-də “Sığorta fəaliyyəti haqqında” Qanuna uyğun olaraq qəbul edilib. Qərara əsasən, lisenziyalar könüllü müraciətlər əsasında ləğv olunub.

Azərbaycanda audit institutları qarşısında müəyyən edilmiş gözləntilərin reallaşmaması subyektiv və obyektiv amillərdən qaynaqlanır.

"Operativ Məlumat Mərkəzi-OMM" xəbər verir ki, bunu Palatanın sədri Vüqar Gülməmmədov Bakıda keçirilən, "Auditor xidməti haqqında" qanunun 30 illiyinə həsr olunmuş "Yaşıl iqtisadiyyat zəminində hesabatlılıq və şəffaflıq" mövzusunda beynəlxalq konfransda bildirib.

Onun sözlərinə görə, bu amillərin bir qismi audit orqanlarına, bir qismi isə onların obyektlərinə bağlıdır.

"Əmək bazarında müvafiq bacarıqlara malik səriştəli kadrların çatışmazlığı və iş yerlərinin vakant qalması audit institutları üçün əsas problemlərdən biridir. Eyni zamanda, keyfiyyətin idarə edilməsi sistemində boşluqlar, yeni texnologiyaların tətbiqində gecikmələr bu sahədə əhəmiyyətli çətinliklər yaradır. Audit orqanlarından mandatlarına aid olmayan gözləntilərin olması auditin effektivliyini azaldan amillərdəndir. Audit prosesinə hüquq-mühafizə orqanı kimi yanaşılması, auditin təftişdən fərqləndirilməməsi və müəyyən edilən nöqsanların aradan qaldırılmasının audit orqanlarından tələb edilməsi problemlərdən biridir. Bəzi sahələrin həddindən artıq spesifik olması onların auditinin keçirilməsini çətinləşdirir", - deyə sədr qeyd edib.

"Bununla yanaşı, daxili audit institutlarının kənar audit üçün lazımi əminliyi təmin etməməsi də auditin inkişafını ləngidir. Bəzi sahələrin auditi üçün zəruri infrastrukturun olmaması da audit prosesini çətinləşdirən faktorlardandır. Məsələn, performans büdcəsinin olmaması performans auditinin keçirilməsinə mane olur. Eyni zamanda, dövlət sektorunda mühasibat uçotu və maliyyə hesabatlarının vahid proqram təminatı ilə əlaqələndirilməməsi, qurumlararası IT sistemlərinin inteqrasiyasının olmaması və bu sistemlərə audit orqanlarının çıxış imkanlarının məhdud olması da auditin keyfiyyətinə mənfi təsir göstərir. Davam edən investisiya layihələri üzrə preauditin yetərsiz qalması da bu sahədə müşahidə olunan problemlərdəndir", - V.Gülməmmədov əlavə edib.

Azərbaycan Mərkəzi Bankı (AMB) bu həftə növbəti dəfə uçot faiz dərəcəsi ilə bağlı qərarını verəcək.

"Operativ Məlumat Mərkəzi-OMM" xəbər verir ki, sentyabrın 18-də AMB bu il ərzində faiz dərəcəsi ilə bağlı altıncı qərarını açıqlayacaq.

Son iki qərarında AMB-nin İdarə Heyəti uçot dərəcəsini sabit saxlayıb. Mərkəzi Bank uçot dərəcəsini 7,25%, faiz dəhlizinin aşağı həddini 6,25%, faiz dəhlizinin yuxarı həddi isə 8,25% səviyyəsində dəyişməz saxlayıb.

Mərkəzi Bankdan bildirilib ki, uçot dərəcəsinin dəyişməz saxlanılması və ya artırılması ilə bağlı növbəti qərarlar faktiki inflyasiya və proqnozu, xarici və daxili risk amillərinin dinamikasından asılı olacaq.

Asiya İnkişaf Bankı (ADB) Azərbaycanda Şimal-Cənub dəhlizinin əsas hissəsini təkmilləşdirmək və regional əlaqələri gücləndirmək məqsədilə 131,5 milyon ABŞ dolları məbləğində kreditin ayrılmasını təsdiq edib.

"Operativ Məlumat Mərkəzi-OMM" bu barədə bankın məlumatına istinadən xəbər verir.

Layihənin ümumi dəyəri 160,5 milyon ABŞ dolları təşkil edir ki, bunun da 29 milyon ABŞ dolları Azərbaycan hökumətinin payına düşür. Kredit ADB-nin çevik kredit məhsulu çərçivəsində müəyyən edilmiş faiz dərəcəsi ilə 2 il güzəştli dövr daxil olmaqla 22 il müddətinə veriləcək.

Vəsait Sumqayıt-Yalama hissəsində mülki tikililər və dəmir yolu keçidləri də daxil olmaqla 166 kilometrlik ikixətli magistralın bərpasının tamamlanmasına yönəldiləcək. Bu kredit ölkədə dəmir yolu əməliyyatlarının modernləşdirilməsinə yönəlmiş və 2017-ci ildə təsdiqlənmiş Dəmir Yolu Sektorunun İnkişafı Proqramına əlavə maliyyələşdirmədir.

“Dəmir yolu infrastrukturunun modernləşdirilməsi təhlükəsizliyi və enerji səmərəliliyini artıracaq və nəqliyyat xərclərini azaldacaq. Bundan əlavə, bu, Azərbaycanın Avropa və Asiyanın kəsişməsindəki strateji mövqeyini gücləndirəcək”, - ADB-nin Mərkəzi və Qərbi Asiya Regional Departamentinin Baş direktoru Yevgeni Jukov bildirib.

Layihə təkmilləşdirilmiş dəmir yolu və multimodal infrastruktur, eləcə də dəmir yolu sektorunda islahatlar vasitəsilə regional iqtisadi inkişafa töhfə verən Mərkəzi Asiya Regional İqtisadi Əməkdaşlıq Proqramının (CAREC) nəqliyyat strategiyasına uyğundur.

Dəmir Yolu Sektorunun İnkişafı Proqramı çərçivəsində “Azərbaycan Dəmir Yolları” (ADY) QSC 2018-2019-cu illərdə hərtərəfli islahatlar həyata keçirib ki, bu da onun maliyyə vəziyyətinin və idarəetməsinin yaxşılaşdırılmasına kömək edib. 2018-ci ildən 2022-ci ilədək ADY-nin yük daşımalarının həcmi 34 % artaraq 14 milyon tondan 18,7 milyon tona çatıb və bu həcmin 80 %-dən çoxu beynəlxalq və tranzit daşımaların payına düşüb.

ADB Asiya və Sakit Okean regionu üçün iqlim bankı kimi, həmçinin Azərbaycanın 2024-cü ilin noyabrında Bakıda keçiriləcək BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) sədrliyini dəstəkləyir və tədbirin keçirilməsi üçün ölkənin potensialının artırılmasına kömək edir.

Azərbaycan 1999-cu ildə ADB-ə qoşulandan sonra bank nəqliyyat, enerji, səhiyyə və kənd təsərrüfatı kimi sektorlarda suveren və özəl layihələri dəstəkləmək üçün 5 milyard ABŞ dollarından çox vəsait ayırıb.

1966-cı ildə yaranmış Bankın üzvlüyünə 49-u regiondan olmaqla 68 ölkə daxildir.

Hesablama Palatasının sədri Vüqar Gülməmmədovun rəhbərliyi ilə keçirilmiş növbəti Kollegiya iclasında “Dənizkənarı Bulvar İdarəsi və tabeliyində olan qurumlar üzrə dövlət vəsaitlərinin və əmlakının idarə olunmasının auditinin nəticələrinə dair Auditor hesabatı” müzakirə edilib.

"Operativ Məlumat Mərkəzi-OMM" bu barədə Palataya istinadən xəbər verir.

Bildirilib ki, keçirilmiş uyğunluq auditi ilə 47,9 milyon manat maliyyə vəsaiti olmaqla 2021-2023-cü illər əhatə edilib. Audit dövlət büdcəsinin vəsaitləri hesabına dövlət sifarişi üzrə öhdəliklərin yerinə yetirilməsinin, dövlət satınalmalarının planlaşdırılması və icrasının, eyni zamanda dövlət əmlakının qorunub saxlanılmasının, idarə edilməsinin və uçotunun aparılmasının bütün əhəmiyyətli aspektlər baxımından audit meyarlarına uyğun olmaması və uyğunsuzluqların əsasən yayılan olması, eləcə də idarəetmə qərarlarının dövlət resurslarından qənaətli istifadə və artıq xərclərin qarşısının alınması baxımından dövlət sektoru kontekstində düzgünlük meyarlarına bir çox hallarda cavab verməməsi və cinayət tərkibinin əlamətlərinin ehtimal olunması ilə bağlı mənfi rəyin verilməsi ilə nəticələnib.

Müzakirələrin nəticəsinə əsasən auditor hesabatının təsdiq olunmasına, maliyyə uçotu, vergi öhdəliklərinin icrası, eləcə də dövlət əmlakının uçotu sahəsində aşkar edilmiş nöqsanların aradan qaldırılması məqsədilə qurum tərəfindən zəruri işlərin görülməsinə, habelə dövlət vəsaitindən və əmlakından istifadədə aşkar edilmiş hüquqpozmalarda cinayət tərkibi əlamətlərinin ehtimal olunması nəzərə alınmaqla müvafiq materialların Baş Prokurorluğa göndərilməsinə dair qərar qəbul olunub.

Azərbaycan Dövlət Neft Fondunun (ARDNF) İcraçı direktoru İsrafil Məmmədovun rəhbərlik etdiyi nümayəndə heyətinin Çinə işgüzar səfəri çərçivəsində 24-cü Çin Beynəlxalq İnvestisiya və Ticarət Sərgisinin açılış mərasimində iştirak edib, bir sıra dövlət və özəl sektor qurumları ilə görüşlər keçirib.

"Operativ Məlumat Mərkəzi-OMM" bu barədə Fonda istinadən xəbər verir.

Məlumata görə, Çin Dövlət Şurasının Baş nazirinin müavini He Lifeng və digər dövlət qurumlarının nümayəndələri ilə "dəyirmi masa"da iki ölkənin suveren sərvət fondlarının birgə fəaliyyəti üçün mövcud olan imkanlar, potensial tərəfdaşlıq sahələri, eləcə də investisiya tədbirləri çərçivəsində davamlı inkişaf və yaşıl enerji təcrübələrinin tətbiqinə dair fikir mübadiləsi aparılıb.

Səfər çərçivəsində həmçinin Çin İnvestisiya Korporasiyası sədrinin müavini Liu Haolinq, “Blackstone” investisiya qrupunun prezidenti Conatan Qrey, “Brookfield Asset Management” şirkətinin baş icraçı direktoru Brüs Flatt, Çin Xalq Bankının sədr müavini Xuan Changneng, Çinin “China Energy Engineering Corporation”, “CATL”, “HiTHIUM” və digər sənaye və enerji şirkətlərinin rəhbər nümayəndələri ilə görüşlər keçirilib və ARDNF-nin sözügedən qurumlarla əməkdaşlıq əlaqələrinin genişləndirilməsi və investisiya perspektivləri müzakirə olunub.