Azərbaycan boru kəmərləri ilə qaz ixrac etdiyi ölkələrin sayına görə dünyada ilk sırada qərarlaşıb. Hazırda Azərbaycan qazını idxal edən ölkələrin sayı artıq 16-ya çatıb.
“Operativ Məlumat Mərkəzi-OMM” xəbər verir ki, bu barədə Azərbaycanın baş naziri Əli Əsədov Türk Dövlətləri Təşkilatına (TDT) üzv dövlətlərin hökumət başçılarının və vitse-prezidentlərinin görüşündə çıxışı zamanı məlumat verib.
"Azərbaycanın enerji siyasəti yalnız karbohidrogen resursları ilə məhdudlaşmır. Ölkəmiz hazırda yaşıl enerji gündəliyini fəal şəkildə təşviq edərək, bərpa olunan enerji mənbələrinin inkişafına xüsusi önəm verir", - deyə baş nazir vurğulayıb.
O qeyd edib ki, Azərbaycanın, eyni zamanda Özbəkistan və Qazaxıstanın bərpa olunan enerji potensialından faydalanmaqla regionlararası əlaqələrin inkişafı əməkdaşlığın əsas istiqamətlərindən biridir.
Hökumət başçısı əlavə edib ki, bu baxımdan Qırğızıstanın Avropaya yaşıl enerjinin ixracı üzrə əməkdaşlığa qoşulmaq niyyəti alqışlanır.
