Prezident administrasiyasının sözçüsü Manuel Adorni bildirib ki, Argentinanın yeni hökuməti ölkənin BRİCS- də iştirakı məsələsinin daha hərtərəfli araşdırılmasını tələb edir.
"Operativ Məlumat Mərkəzi-OMM" xəbər verir ki, bu barədə xarici KİV məlumat yayıb.
"Biz rəsmi xarici siyasətdə dəyişikliklər mərhələsinə qədəm qoyuruq. Bunu nəzərə alsaq, bu məsələ BRİCS-ə qoşulmağa dəvət edilmiş əvvəlki hökumətin apardığı təhlildən qat-qat daha əhatəli təhlil tələb edir", - o, mətbuat konfransında deyib.
O, prezident Xavyer Mileinin BRİCS üzvlərinə ölkəsinin qrupa qoşulmayacağı barədə rəsmi məlumat verdiyini təsdiqləyib. Argentina lideri Rusiya prezidenti Vladimir Putin, Çin prezidenti Si Cinpinə, Braziliya prezidenti Luiz İnasio Lula da Silvaya və Hindistanın baş naziri Narendra Modinə yazdığı məktublarda ölkənin BRİCS-də iştirakını məqsədəuyğun hesab etmədiyini bildirib.
