OMM Redaksiyası
İtaliyalı məşqçi Antonio Konte “Barselona”nın və klubun “La Masia” akademiyasının fəaliyyətini yüksək qiymətləndirib. Onun fikirləri “The Athletic” nəşrində dərc olunub.
Konte 18 yaşlı futbolçuların “La Masia”dan əsas komandaya təbii şəkildə uyğunlaşdığını və böyük stadionda minlərlə tamaşaçı qarşısında oyunu rahatlıqla davam etdirdiyini bildirib. Məşqçinin sözlərinə görə, bu, akademiyada görülən böyük əməyin nəticəsidir.
“Onlar möhtəşəm iş görürlər. Akademiyada hər şey ahəngdar şəkildə, baş məşqçi ilə uyğun işləyir. Mən onların akademiyasına baş çəkməyi çox istərdim. Orada dəqiq struktur qurulub və bu sistem əsas komanda ilə ideal şəkildə uzlaşır”, — Konte deyib.
Antonio Konte daha əvvəl “Napoli”, “İnter”, “Çelsi” və “Yuventus” klublarını çalışdırıb. Hazırda italiyalı mütəxəssis heç bir klubla müqavilə əsasında çalışmır.
