Bakıda keçirilən Ümumdünya Şəhərsalma Forumunun 13-cü Sessiyası (WUF13) çərçivəsində Azərbaycan Respublikasının Minatəmizləmə Agentliyi (ANAMA) tərəfindən “Postmünaqişə dövründə şəhərlərin yenidən qurulması: Humanitar minatəmizləmənin mühüm rolu” mövzusunda xüsusi tədbir təşkil olunub.
Azərbaycan pavilyonunda baş tutan tədbir mina probleminin bərpa və yenidənqurma işlərinə təsirini beynəlxalq ictimaiyyətin diqqətinə çatdırmaq, habelə bu sahədə qlobal əməkdaşlıq imkanlarını müzakirə etmək məqsədi daşıyıb. Görüşdə dövlət qurumlarının və beynəlxalq təşkilatların nümayəndələri iştirak ediblər.
ANAMA-nın İdarə Heyətinin sədri Vüqar Süleymanov çıxışında minatəmizləmənin sadəcə humanitar fəaliyyət deyil, həm də bərpa proseslərinin təməli olduğunu vurğulayıb. O qeyd edib ki, yaşayış evlərinin inşası, infrastrukturun bərpası və iqtisadi fəaliyyətin canlandırılması üçün ərazilərin minalardan təmizlənməsi zəruri şərtdir. V.Süleymanovun sözlərinə görə, Böyük Qayıdış proqramı çərçivəsində minatəmizləmə işləri şəhərsalma və inkişaf strategiyalarına tam inteqrasiya olunub.
Tədbirdə mina təhlükəsinin qlobal miqyasda inkişafı ləngitdiyi qeyd olunaraq, problemin həlli üçün beynəlxalq dəstəyin, innovativ yanaşmaların və təcrübə mübadiləsinin vacibliyi diqqətə çatdırılıb.
ANAMA yanında İctimai Şuranın sədr müavini Emil Həsənovun moderatorluğu ilə keçirilən panel müzakirələrində aşağıdakı şəxslər iştirak ediblər:
- Samir Poladov – ANAMA-nın İdarə Heyəti sədrinin müavini
- Mariyana Kuyundziç – Avropa İttifaqının Azərbaycandakı nümayəndəliyinin rəhbəri, səfir
- Rodrigo Labardini – ADA Universitetinin professoru, Meksikanın Azərbaycandakı keçmiş səfiri
- Ramil Cahangirov – Dövlət Şəhərsalma və Arxitektura Komitəsinin Layihələrin idarə edilməsi şöbəsinin müdiri
Müzakirələr zamanı münaqişədən sonrakı dövrdə təhlükəsiz və inklüziv şəhərlərin qurulmasında minatəmizləmənin strateji əhəmiyyəti, habelə bu istiqamətdə beynəlxalq əməkdaşlığın rolu geniş təhlil edilib.
