Afət Ziyadqızı
Almaniyanın Köln şəhərində hüquq-mühafizə orqanları 16 yaşlı yeniyetmə qıza qarşı cinsi qanunsuzluq və qeyri-etik hərəkətlər etməkdə şübhəli bilinən qırmızı-qızılı rəngli robota əl qoyub.
"Operativ Məlumat Mərkəzi-OMM" xəbər verir ki, hadisə şəhər mərkəzində yerləşən cəld qida (fast-food) restoranının yaxınlığında baş verib. Məlumata görə, 120 santimetr hündürlüyündə olan robot dal tərəfdən 16 yaşlı qıza yaxınlaşaraq ona qarşı qeyri-əxlaqi fiziki təmaslar edib. Zərərçəkmiş qızın qışqıraraq ərazidən uzaklaşmasından sonra hadisə barədə dərhal polis orqanlarına məlumat verilib.
Şimali Reyn-Vestfaliya Polisinin yaydığı rəsmi bəyanata əsasən, robotun 16 yaşlı sahibi və onun 19 yaşlı dostu hadisəni real vaxt rejimində (canlı yayımda) sosial şəbəkələr üzərindən nümayiş etdiriblər.
Əraziyə cəlb edilən polis əməkdaşları qısa müddət sonra şübhəli şəxsləri yaxınlıqdakı küçədə saxlayıblar. Əməliyyat zamanı müsadirə edilən robot şübhəlilərə məxsus avtomobilin yük yerində aşkar edilib.
Polis idarəsinin təqdim etdiyi görüntülərdə qara bığ, qızılı zəncir və ağ jiletlə geyindirildiyi görünən robotla yanaşı, şübhəlilərə aid iki mobil telefon da maddi sübut kimi götürülüb. Hüquq-mühafizə orqanları robotun hərəkətlərinin kənardan uzaqdan idarəetmə pultu və ya proqram təminatı vasitəsilə qəsdən istiqamətləndirildiyini müəyyən etmək üçün kompleks ekspertizalar təyin edib.
Şimali Reyn-Vestfaliya Polisi “Facebook” səhifəsində əlavə açıqlama yayaraq, hadisə ilə bağlı sosial şəbəkələrdə yazılan təhqiramiz və qeyri-etik şərhlərin hüquqi məsuliyyət yarada biləcəyi barədə xəbərdarlıq edib.
