Azərbaycan millisi Andorra ilə keçirdiyi beynəlxalq yoldaşlıq görüşündə 3:1 hesabı ilə qalib gəlib.
Matçdan sonra Bədavi Hüseynovun iştirak ərizəsində adı olmadığı halda meydana çıxması ilə bağlı xəbərlər yayılıb. Həmin məlumatlarda Azərbaycan millisinə texniki məğlubiyyət verilə biləcəyi bildirilib.
AFFA-nın mətbuat katibi Aida Əliyeva məsələ ilə bağlı açıqlamasında Bədavi Hüseynovun adının UEFA-nın rəsmi platformasında yayımlanan Andorra – Azərbaycan oyununun protokolunda yer aldığını deyib.
Əliyevanın sözlərinə görə, AFFA-ya qarşılaşma ilə əlaqədar qayda pozuntusu və ya texniki məğlubiyyət ehtimalı barədə rəsmi müraciət daxil olmayıb.
Qurum rəsmisi bu cür xəbərlərin AFFA ilə dəqiqləşdirilmədən və qurumun mövqeyi öyrənilmədən ictimaiyyətə təqdim olunmasını təəssüflə qeyd edib.