Vaşinqton İranın İsrailə hücumundan sonra Yaxın Şərq regionunda raketdən müdafiə və hava hücumundan müdafiə sistemlərini genişləndirmək və gücləndirmək üzərində işləyir.

"Operativ Məlumat Mərkəzi-OMM" xəbər verir ki, bu barədə ABŞ prezidentinin milli təhlükəsizlik üzrə köməkçisi Ceyk Sallivan bildirib.

Onun sözlərinə görə, ABŞ-ın İrana qarşı hazırladığı yeni sanksiyalarla yanaşı, Pentaqon və Silahlı Qüvvələrin Mərkəzi Komandanlığı (CENTCOM) inteqrasiya olunmuş raketdən müdafiə və hava hücumundan müdafiə sistemlərinin gücləndirilməsi və genişləndirilməsi üzərində işləyir.

Bundan əlavə, Yaxın Şərqdə yerləşən erkən xəbərdarlıq sistemləri gücləndirilir. Ceyk Sallivan əlavə edib ki, atılacaq addımlar İran raketlərinin və pilotsuz uçuş aparatlarının effektivliyinin daha da azalmasına səbəb olacaq.

Fransanın Sakit okeanda yerləşən Yeni Kaledoniya adasında bazar ertəsi başlayan şiddətli iğtişaşlarda 206 nəfər saxlanılıb.

"Operativ Məlumat Mərkəzi-OMM"  xəbər verir ki, bu barədə xarici KİV məlumat yayıb.

Fransa parlamentində 10 ildən artıqdır adada yaşayan Fransa sakinlərinə əyalət seçkilərində daha çox səsvermə hüququ verilməsini təklif edən qanun layihəsi müzakirə olunmağa başladığı üçün Makronun əmri ilə dünən getdikcə şiddətlənən iğtişaşları yatırmaq üçün fövqəladə vəziyyət elan edilib. İş yerlərinin, nəqliyyat vasitələrinin və infrastrukturun zədələndiyi hadisələrdə üsyançılar yollarda barrikadalar qurub. Yerli media hadisələrdə ən azı 4 nəfərin öldüyünü açıqlayıb.
 

Braziliyada leysan yağışların səbəb olduğu daşqınlarda həyatını itirənlərin sayının 150-yə, itkin düşənlərin sayının isə 112-yə yüksəldiyi bildirilib.

"Operativ Məlumat Mərkəzi-OMM"  xəbər verir ki, bu barədə xarici KİV məlumat yayıb.

Belə ki, ölkənin cənubundakı Rio Qrande-du-Sul əyalətində iki həftədir davam edən yağışların səbəb olduğu daşqınlar səbəbindən can və mal itkiləri artır.

Açıqlamada yaralananların sayının 807-yə yüksəldiyi və seldən zərər çəkənlərin sayının 2 milyon 120 mini, köçkünlərin sayının isə 620 mini keçdiyi bildirilib. Fəlakət bölgəsindən 80 min insanın xilas edildiyi, axtarış-xilasetmə işlərinin davam etdiyi bildirilib.

Nigeriyanın Kano əyalətində məsciddə partlayış baş verib.

"Operativ Məlumat Mərkəzi-OMM" xəbər verir ki, bu barədə Kano Polisinin İctimaiyyətlə Əlaqələr Mütəxəssisi Abdullahi Haruna məlumat yayıb.

Hadisə neft barabanından qaynaqlanan partlayış səbəbindən baş verib.

Partlayış nəticəsində 11 nəfər ölüb, 17 nəfər yaralanıb.

Müharibə təmas xəttində vəziyyət hələ o səviyyədə deyil ki, Ukrayna hakimiyyətini danışıqlar masası arxasına oturmağa məcbur etsin.

"Operativ Məlumat Mərkəzi-OMM" xəbər verir ki, bunu NATO Hərbi Komitəsinin rəhbəri admiral Rob Bauer deyib.

Bauerin sözlərinə görə, həm ruslar, həm də ukraynalılar “çətinliklər yaşayırlar”.

O, Rusiya qüvvələrinin irəliləməsinə baxmayaraq, Rusiya Silahlı Qüvvələrinin “strateji uğurlara” nail ola bilməyəcəyinə diqqət çəkib.

İsrail ordusunun 7 oktyabr 2023-cü il tarixindən etibarən Qəzza zolağına həyata keçirdiyi hücumlarda ölənlərin sayı son 24 saatda 39 nəfər artaraq 35 min 272-yə çatıb.

"Operativ Məlumat Mərkəzi-OMM"  xəbər verir ki, bu barədə xarici KİV məlumat yayıb.

Bu hücumlarda daha 64 fələstinlinin isə yaralandığı bildirilib. Bununla da yaralıların sayının isə 79 min 205-ə yüksəldiyi qeyd edilib.