ABŞ Konqresinin ən nüfuzlu üzvlərindən ibarət "Səkkizlik qrupu" İrana qarşı həyata keçirilən hərbi əməliyyatların miqyasına görə təəccüblərini gizlətməyiblər.
"Operativ Məlumat Mərkəzi-OMM" xəbər verir ki, bu barədə "CBS News" telekanalı öz mənbələrinə istinadən məlumat yayıb.
Mənbənin bildirdiyinə görə, konqresmenlər zərbələrin bu dərəcədə geniş ərazini əhatə edəcəyini və hədəf seçiminin bu qədər çoxşaxəli olacağını gözləmirdilər.
Amerikalı qanunvericilərdən biri telekanala müsahibəsində qeyd edib ki, əməliyyatın miqyası barədə onlara heç bir ilkin işarə verilməyib.
Məlumata görə, ABŞ Dövlət katibi Marko Rubio hərbi əməliyyat başlamazdan əvvəl yalnız Konqres rəhbərliyinin bir neçə nümayəndəsini məlumatlandırıb.
Eyni zamanda, senator Jack Reed vurğulayıb ki, Konqres İrana qarşı genişmiqyaslı hərbi əməliyyatın keçirilməsinə razılıq verməyib.
Senatorun sözlərinə görə, Donald Tramp administrasiyası tərəfindən bu hücumların zəruriliyi ilə bağlı qanunvericilərə heç bir əsaslandırılmış sənəd və ya izahat təqdim olunmayıb. Hazırda Vaşinqtonda bu hərbi addımın hüquqi əsasları ətrafında müzakirələr davam edir.
