İranın xarici işlər naziri Abbas Əraqçi ABŞ-yə qarşı sərt açıqlama verərək, Vaşinqtonun təhdid xarakterli ritorikasını davam etdirəcəyi təqdirdə yekun razılaşma ilə bağlı danışıqların başlanmayacağını bildirib.
“Operativ Məlumat Mərkəzi-OMM” xəbər verir ki, Abbas Əraqçi tərəflər arasında imzalanmış “İslamabad Memorandumu”nun müddəalarına diqqət çəkərək, təhdid və təzyiq şəraitində diplomatik danışıqların aparılmasının mümkün olmadığını qeyd edib.
Məlumata görə, İranın xarici işlər naziri bu açıqlamanı ölkənin ali rəhbəri Ayətullah Seyid Əli Xameneinin dəfn mərasimindən sonra verib. O, mərasimdə milyonlarla insanın iştirak etdiyini vurğulayaraq, bunun İran xalqının birliyini və ölkənin dayanıqlığını nümayiş etdirdiyini bildirib.
Əraqçi qeyd edib ki, İran xalqı və ölkənin silahlı qüvvələri heç bir hədə və təzyiq qarşısında geri çəkilməyəcək. Onun sözlərinə görə, kütləvi iştirak rəsmi Tehranın daxili dəstəyinin göstəricisidir.
İran diplomatiyasının rəhbəri ABŞ-ni imzaladığı sənədlərə hörmət etməyə və üzərinə götürdüyü öhdəlikləri yerinə yetirməyə çağırıb. Tehran hesab edir ki, regional sabitliyin qorunması üçün Vaşinqton razılaşmalara sadiq qalmalı və qeyri-müəyyən siyasətdən uzaq durmalıdır.
