Bu gün Yeni Kaledoniyada “La Voix du Caillou” jurnalında “Sakit Okeana xarici müdaxilə: Fransa vəziyyəti yaxından izləyir” adlı məqalə dərc olunub.
"Operativ Məlumat Mərkəzi-OMM" xəbər verir ki, Azərbaycan Prezidenti İlham Əliyevin portreti olan şəkil jurnalın üz qabağında əsas xəbərdə dərc olunub.
Məqalədə Azərbaycanın Yeni Kaledoniya xalqına dekolonizasiya işindəki haqlı mübarizəsinə verdiyi dəstək xatırladılır.
Qeyd olunur ki, Yeni Kaledoniya xalqı Azərbaycan Prezidenti və xalqına öz təşəkkürünü ifadə etmək üçün Fransa kolonializminə qarşı aksiyalarda Azərbaycanın bayrağını və dövlət başçısı İlham Əliyevin "Dəmir Yumruq" portretini qaldırır.
Məqalədə Yeni Kaledoniya parlamentinin Ailə və Qadınların hüquqları komissiyasının sədr müavini Marie Line Sakilianın Fransa əleyhinə aksiyada çıxışı xüsusilə qeyd olunur.
Qeyd edək ki, M.L.Sakilia martın 21-də Yeni Kaledoniyanın mərkəzi meydanında keçirilən geniş etiraz aksiyasında Azərbaycan, eləcə də Bakı Təşəbbüs Qrupuna göstərilən dəstəyə görə təşəkkürünü ifadə etmək üçün videomüraciət yaymışdı.
