Rusiya və Qırğızıstan terror təhlükələrinə qarşı birgə mübarizəni müzakirə ediblər

Moskva və Bişkek transsərhəd terror təhdidlərinə qarşı birgə mübarizədə qərarlı olduqlarını bildiriblər.

"Operativ Məlumat Mərkəzi-OMM" xəbər verir ki, bu barədə məlumat Rusiya Xarici İşlər Nazirliyinin saytında Bişkekdə keçirilən ikitərəfli nazirliklərarası məsləhətləşmələrin yekunlarına görə dərc edilmiş bəyanatda dərc olunub.

Məlumatda bildirilir ki, tərəflər ikitərəfli və beynəlxalq gündəliyin cari məsələlərini müzakirə ediblər.

“Regional güclərin Mərkəzi Asiyada sabitliyin və təhlükəsizliyin qorunmasında imtiyaz sahibi olduqları və radikalizm, terrorizm, narkotik vasitələrin istehsalı və qeyri-qanuni dövriyyə də daxil olmaqla, transsərhəd təhdidlərə qarşı birgə mübarizədə qətiyyətli olduqları vurğulanıb”, - sənəddə deyilir.

Bundan əlavə, danışıqlar zamanı Aİİ, KTMT və ŞƏT-in rolunun və bu birliklər arasında qarşılıqlı əlaqələrin gücləndirilməsinin vacibliyi vurğulanıb.