Dünyanın ən böyük və ən təhlükəli buzlaqlarından biri hesab edilən “Qiyamət buzlağı” kimi tanınan Thwaites buzlağının əriməsi bir sıra ölkələr üçün ciddi fəsadlar yarada bilər.
"Operativ Məlumat Mərkəzi-OMM" xəbər verir ki, bu barədə “Daily Express” nəşri məlumat yayıb.
Məlumata görə, Thwaites buzlağının Antarktida sahillərindən qopması və ya daha sürətlə əriməsi halında ən çox təsirlənəcək ölkələr sırasında Birləşmiş Krallıq, Hollandiya, ABŞ, Banqladeş, Tuvalu və Maldiv adaları yer alır. Ekspertlərin fikrincə, bu ölkələrdə bəzi sahilyanı şəhərlər və hətta bütöv adalar su altında qala bilər.
Qeyd olunur ki, Thwaites buzlağı Qərbi Antarktika buz təbəqəsinin əsas hissələrindən biridir və “tıxac” rolunu oynayaraq bütöv buz sisteminin sabitliyini qoruyur. Onun çökməsi isə daha geniş miqyaslı buz itkisinə səbəb ola bilər.
Buzlağın ümumi sahəsi təxminən 192 min kvadrat kilometrdir və bu göstərici onu Böyük Britaniya adasından bir qədər kiçik edir. O, Amundsen dənizində yerləşir və təxminən 120 kilometr uzunluğunda okeanla təmas xəttinə malikdir.
Mütəxəssislərin hesablamalarına görə, bu buzlağın tam çökməsi dünya okean səviyyəsinin təxminən 3,3 metr yüksəlməsinə səbəb ola bilər ki, bu da qlobal miqyasda ciddi iqlim və ekoloji böhran yaradacaq.
