İspaniya Milli Məhkəməsi humanitar yardım gəmisi "Madleen"ə edilən hücum səbəbilə İsrail Baş naziri Benyamin Netanyahunun, Xarici İşlər naziri Gideon Saarın və bəzi yüksək rütbəli israilli hərbçilərin barəsində cinayət işi açıb və istintaqa başlayıb.
"Operativ Məlumat Mərkəzi-OMM" xəbər verir ki, bununla bağlı xarici KİV məlumat yayıb.
Avropa Parlamenti (AP) millət vəkili Jaume Asens "X" hesabında da bunu təsdiqləyib.
O, istintaq çərçivəsində pilotsuz hava vasitələrinin istifadəsi, gözyaşardıcı qazdan istifadə və gəmidəki 12 aktivistin qeyri-qanuni şəkildə həbs edilməsinin araşdırılacağını qeyd edib.
Asens istintaq qərarının İsrailin cəzasız qalmasına qarşı mübarizədə önəmli bir addım olduğunu vurğulayaraq deyib:
“Dövlətlər öz öhdəliklərini yerinə yetirmədikdə, ədaləti hərəkətə keçirmək vəzifəsi vətəndaş cəmiyyətinə düşür. Ümid edirik ki, bu təşəbbüs digər ölkələrə də yayılacaq və Netanyahu ədalətlə üzləşmədən Avropaya ayaq basa bilməyəcək”.
