Macarıstanın xarici işlər naziri Peter Siyarto BMT-nin münaqişə zamanı Ukraynada toplanmış külli miqdarda silaha nəzarət mexanizmi yaratmalı olduğu fikrini bildirib.
"Operativ Məlumat Mərkəzi-OMM" xəbər verir ki, o, bu barədə "X" sosial hesabında bildirib.
Siyarto vurğulayıb ki, Macarıstan onun bilavasitə yaxınlığında böyük silah ehtiyatlarının nəzarətsiz yığılması riski ilə yaşamaq istəmir.
“Buna görə də biz BMT-nin Ukraynada müharibə başa çatdıqdan sonra külli miqdarda silahın taleyi ilə bağlı məsələnin etibarlı həllini təmin edəcək mexanizmin işə salınmasını gözləyirik”, - nazir yazıb.
O əlavə edib ki, BMT baş katibinin müavini ilə bu məsələ ilə bağlı məsləhətləşmələri ona nikbinlik verib.
