İsrail və radikal HƏMAS hərəkatı arasında vasitəçilər vasitəsilə aparılan danışıqlarda bu həftə irəliləyiş əldə olunub.
"Operativ Məlumat Mərkəzi-OMM" xəbər verir ki, bu barədə “The Times of Israel” qəzeti adı açıqlanmayan yüksək rütbəli ərəb diplomatına istinadən yazıb.
Nəşrin məlumatına görə, Fələstinin radikal qruplaşması Qətərin təzyiqi altında mövqeyini yumşaldıb.
Tərəflər arasındalı danışıqlar dalana dirəndikdən sonra bu həftə onlar arasında israilli girovlar müqabilində Qəzza zolağında atəşkəsin təmin edilməsi üzrə razılaşmalarda əhəmiyyətli irəliləyiş əldə edilib.
Qeyd olunur ki, Doha HƏMAS-a təzyiq göstərib və danışıqlara yanaşma tərzi dəyişməyəcəyi halda qruplaşmanın Qətərdə yaşayan liderlərinin ölkədən qovulacağı ilə bağlı xəbərdarlıq edib.
Hazırda tərəflər Qəzza bölgəsində 150 gündən artıqdır saxlanılan israilli girovların azad edilməsi müqabilində Fələstin anklavında üç mərhələli atəşkəs razılaşmasını müzakirə edir.
