Ermənistanın Araqatsotn rayonunda (Şorəyel Mahal - Qeyd) silahlı insident baş verib, nəticədə Aştarak şəhərinin vitse-meri Vardan Səfəryan yaralanıb.
Bu barədə "Operativ Məlumat Mərkəzi-OMM" Ermənistan mətbuatına istinadən xəbər verir.
Vurğulanıb ki, hadisə yerli vaxtla saat 17:00-da Qalusti Dzor istirahət zonasına gedən yolda baş verib. Bir neçə şəxs arasında yaranan dava zamanı 37 yaşlı Hayk Q. əlində olan avtomatdan bir neçə dəfə atəş açıb.
Nəticədə Aştarak şəhərinin vitse-meri Vardan Səfəryan və daha bir nəfər yaralanıb, onlar əvvəlcə yerli xəstəxanaya, sonra isə İrəvandakı tibb müəssisələrindən birinə aparılıblar.
Hadisənin təfərrüatına gəlincə isə, dava torpaq üstündə baş verib. Belə ki, 65 yaşlı Qalust Q, onun 37 yaşlı oğlu Hayk Q və Aştarak icmasının başçısı Tovmas Ş. görüşərək torpaq məsələsinə görə dava ediblər.
İcma başçısının adamları yerli sakinləri döyməyə başlayıb və bu zaman 37 yaşlı Hayk Q. üzərindəki avtomatla atəş açıb. Güllələr Aştarak şəhərinin vitse-meri, 52 yaşlı Vardan Səfəryana və 26 yaşlı Q. Qora dəyib.
