“Avropa ölkələrinin liderləri Ukrayna ilə bağlı danışıqların uğur qazanacağına və Moskvanın səmimi şəkildə razılığa gəlmək istədiyinə inanmırlar. Lakin ABŞ Prezidenti Donald Trampın sülh təşəbbüslərini dəstəkləməyə davam edirlər və ümid edirlər ki, Tramp Rusiya ilə bağlı məyus olaraq daha sərt mövqe tutacaq”.
"Operativ Məlumat Mərkəzi-OMM" xəbər verir ki, bu barədə “Politico” nəşri Avropalı diplomatlara istinadən məlumat yayıb.
“Məqsəd Trampın sülh cəhdlərini dəstəkləməkdir, ta ki o başa düşənədək ki, Rusiya Prezidenti Vladimir Putinin müharibəni bitirmək niyyəti yoxdur”, — deyə nəşr qeyd edib.
Mənbəyə görə, Avropanın Ukraynanı dəstəkləyən müttəfiqləri ABŞ-nin sülh danışıqlarına vasitəçilik təşəbbüsünü məmnuniyyətlə qəbul ediblər, amma bu, onun uğuruna inandıqları üçün deyil. Əksinə, bu təşəbbüs Rusiyanın niyyətlərini yoxlamaq üçün açıq bir sınaq kimi dəyərləndirilir. Avropa ümid edir ki, əgər Rusiya Prezidenti Vladimir Putin və Ukrayna lideri Volodimir Zelenski arasında mümkün danışıqlarda irəliləyiş olmazsa, Tramp Rusiyaya qarşı sanksiyaları gücləndirəcək.
