Almaniyanın xarici işlər naziri Annalena Berbok İsrailə səfər edəcək.
"Operativ Məlumat Mərkəzi-OMM" AFP-yə istinadən xəbər verir ki, bu barədə Almaniya Xarici İşlər Nazirliyinin sözçüsü Sebastian Fişer mətbuat konfransında bildirib.
Onun sözlərinə görə, yanvarın 6-da Almaniya XİN rəhbəri xanım Berbok İsrailə gedəcək və orada İsrail xarici işlər naziri İsrael Katz, Prezident İsaak Herzoqla görüşlər keçirəcək. Bu, oktyabrın 7-dən bəri Almaniya xarici işlər nazirinin İsrailə dördüncü səfəri olacaq.
Almaniyalı nazir regiona səfəri çərçivəsində Fələstin Prezidenti Mahmud Abbas və Fələstinin xarici işlər naziri Riyad əl-Maliki ilə də görüşlər keçirəcək.
Annalena Berbok misirli həmkarı Sameh Şukri ilə görüşmək üçün daha sonra Misirə gedəcək.
Almaniya XİN sözçüsü deyib ki, Annalena Berbokun Livana da səfəri planlaşdırılır.
O qeyd edib ki, danışıqlarda "Qəzzada dramatik humanitar vəziyyət, İordan çayının qərb sahilindəki vəziyyət və İsrail-Livan sərhədindəki son dərəcə qeyri-sabit vəziyyət", həmçinin HAMAS-ın girovlarının azad edilməsi üçün səylər müzakirə olunacaq.
