"Türkiyədə tikilməkdə olan Akkuyu Atom Elektrik Stansiyasında ilk reaktor gələn il işə salınacaq".
"Operativ Məlumat Mərkəzi-OMM" xəbər verir ki, bu sözləri Türkiyənin energetika naziri Alparslan Bayraktar deyib.
"Biz aktiv şəkildə nüvə enerjisinə sərmayə qoyuruq və Rosatom ilə birlikdə Türkiyədə dörd nüvə reaktoru tikirik. Biz Akkuyu Atom Elektrik Stansiyasında ilk reaktoru işə salmağa çox yaxınıq", - o qeyd edib.
Bayraktarın sözlərinə görə, Türkiyənin ümumilikdə ən azı 12 klassik reaktor və kiçik modul reaktora ehtiyac var.
Qeyd edək ki, Akkuyu Atom Elektrik Stansiyası (AES) Türkiyənin Rosatom dövlət korporasiyası tərəfindən tikilən ilk atom elektrik stansiyasıdır. Akkuyu layihəsinə Rusiya istehsalı olan VVER III+ reaktorları olan dörd enerji bloku daxildir. Hər blokun gücü 1200 MVt olacaq.
