Zaporojye Atom Elektrik Stansiyası (ZAES) məsələsi Cenevrədə Ukraynadakı münaqişənin həlli ilə bağlı keçiriləcək danışıqlarda müzakirə oluna bilər.
“Operativ Məlumat Mərkəzi-OMM” xəbər verir ki, bu barədə “RIA Novosti” agentliyinə danışan mənbə bildirib.
Mənbənin sözlərinə görə, Zaporojye AES-in müzakirə ediləcəyi istisna olunmur və stansiyanın Rusiyaya məxsusluğu şübhə doğurmur.
Ukrayna üzrə danışıqların üçüncü raundu fevralın 17-18-də Cenevrədə keçiriləcək. Görüşdə ABŞ, Rusiya və Ukraynadan nümayəndə heyətləri iştirak edəcək. Rusiya nümayəndə heyətinə Rusiya Prezidentinin köməkçisi Vladimir Medinski rəhbərlik edəcək.
Agentliyin məlumatına görə, danışıqlar BMT-nin Cenevrədəki mənzil-qərargahında baş tutmayacaq. İsveçrənin rolu nümayəndə heyətlərinin girişinin və təhlükəsizliyinin təmin olunması ilə məhdudlaşacaq.
Qeyd olunub ki, görüşdə Ukraynadakı münaqişənin həlli ilə bağlı hərbi, siyasi və humanitar məsələlərin müzakirəsi planlaşdırılır.
