“Azərbaycan yurdlarından didərgin salınmış azərbaycanlıların hüquqlarının BMT orqanlarının dəstəyi ilə nəzərə alınacağını gözləyir. Bu, gerçək sül üçün mühüm əhəmiyyət kəsb edir”.
"Operativ Məlumat Mərkəzi-OMM" xəbər verir ki, bu fikirləri Azərbaycanın xarici işlər naziri Ceyhun Bayramov Cenevrədə BMT-nin İnsan Hüquqları Şurasının 54-cü sessiyasının 5-ci iclasında çıxışı zamanı deyib.
O xatırladıb ki, 1987-1991-ci illər ərzində Ermənistan beynəlxalq hüququ kobud şəkildə pozaraq 200 mindən çox azərbaycanlını öz yurdundan didərgin salıb: "Bütün Azərbaycan toponimləri Ermənistan tərəfindən yenidən adlandırıldı. Mədəni və tarixi irsimiz məqsədli şəkildə məhv edildi”.
C.Bayramov Azərbaycanın torpaqlarından qovulan azərbaycanlıların geri qaytarılması istiqamətində dialoqun aparılması ilə bağlı çağırışlarını Ermənistanın həmişə rədd etməsinə də diqqət çəkib: “Ermənistan hökuməti azərbaycanlıların fundamental hüquqları ilə bağlı bu təklifi mütəmadi olaraq rədd etdi. Bununla da İnsan Hüquqları ilə bağlı Bəyannaməni, Qaçqınlar və məcburi köçkünlərlə bağlı Konvensiyanı və digər vacib beynəlxalq aktları pozdu. Ermənistan bunlara - Azərbaycan vətəndaşlarına qarşı beynəlxalq insan haqları qanunlarını ciddi şəkildə pozduğuna görə beynəlxalq aləmdə cavab verməlidir”.
