Bu gün Dövlət Turizm Agentliyinin təşkilatçılığı ilə Azərbaycanda akkreditə olunmuş xarici ölkələrin diplomatik korpusunun nümayəndələri üçün ölkəmizin destinasiya təqdimatı tədbiri keçirilib.

"Operativ Məlumat Mərkəzi-OMM" bu barədə agentliyə istinadən xəbər verir.

Məlumata görə, Azərbaycanın turizm imkanları haqqında məlumatlılığı artırmaq məqsədilə təşkil edilmiş tədbirdə Azərbaycanda fəaliyyət göstərən 60-dan çox diplomatik nümayəndəliyin və beynəlxalq təşkilatların əməkdaşları, fövqəladə və səlahiyyətli səfirlər, attaşe və katiblər iştirak ediblər.

Təqdimat tədbirində çıxış edən agentliyin aparatının rəhbəri Kənan Qasımov tədbirin Azərbaycanın turizm təcrübələrinin və həyata keçirilən fəaliyyətlərin bölüşülməsi baxımından əhəmiyyətini vurğulayıb.

Tədbirdə Azərbaycanın turizm potensialını əks etdirən təbliğat videoçarxları nümayiş etdirilib və Azərbaycan Turizm Bürosunun İdarə Heyətinin sədr müavini Cavanşir Bayramov təqdimatla çıxış edib.

Təqdimatda iştirakçılara Azərbaycan Turizm Bürosunun turizm strategiyasının təməl prinsip və prioritetləri, gəlmə turizmi üzrə statistik göstəricilər, cari il ərzində hədəf bazarlarında planlaşdırılan tədbirlər, media və marketinq fəaliyyətləri, Azərbaycanın əsas turizm marşrutları, turizm xidmət və məhsulları və turizm sənayesinin inkişafına istiqamətlənən təşəbbüslər və digər mövzular haqqında məlumat verilib.

Bakıda keçiriləcək “2024 Formula 1 Azərbaycan Qran Prisi” ilə əlaqədar olaraq bəzi küçə və prospektlərdə nəqliyyatın məhdudlaşdırılması, eləcə də ölkəmizə gələn qonaqların sayının artması gözlənilir.

"Operativ Məlumat Mərkəzi-OMM" xəbər verir ki, bu barədə Heydər Əliyev Beynəlxalq Aeroportunun sərnişinlərə müraciətində bildirilir.

Hava limanı bəyan edib ki, sərnişinlərin səfərlərini bu halları nəzərə alaraq planlaşdırmaları və hava limanına rahat çatmaq üçün əlavə vaxt ayırmaları tövsiyə edilir.

O cümlədən, sərnişinlərin səyahətlərini asanlaşdırmaq üçün bir sıra tövsiyələrə əməl etmələri məsləhət görülür:

• Hava limanına erkən gəlmək: Bütün təhlükəsizlik və qeydiyyat prosedurlarını rahatlıqla keçə bilməniz üçün uçuşdan ən azı 2 saat əvvəl hava limanında olun.
• Onlayn qeydiyyatdan keçmək: Gözləmə müddətini minimuma endirmək üçün uçuşdan əvvəl onlayn qeydiyyatdan keçin. Bəzi aviaşirkətlər uçuşdan 48 saat əvvəl qeydiyyat imkanı təqdim edir, bu imkandan yararlanaraq vaxtınıza qənaət edin.
• Uçuş terminalını əvvəlcədən yoxlamaq: Uçuşunuzun hansı terminaldan həyata keçiriləcəyini elektron biletinizdən və ya aviaşirkətin rəsmi veb-saytından əvvəlcədən öyrənin ki, qarışıqlıq olmasın.
• “Aeroexpress” xidmətindən istifadə etmək: “28 may” metro stansiyasından hava limanına və geri rahat və tıxacdan kənar bir yol seçmək üçün Aeroexpress ictimai nəqliyyatından istifadə edin.
• Parklanma qaydalarına riayət etmək: Nəqliyyat vasitənizi yalnız hava limanında parklanma üçün ayrılmış rəsmi yerlərdə saxlayın. Əks halda, keçidlərin bağlanmasına və digər avtomobillərin hərəkətinə mane olaraq süni tıxaclar yarada bilərsiniz. Sərnişinləri 5 dəqiqə ərzində düşürüb və ya götürmək üçün xüsusi “drop-off” zonalarından istifadə edin.
• Parklanma ödənişlərini onlayn etmək: Vaxtınıza qənaət etmək üçün AzParking, ABB, Birbank mobil tətbiqləri və ya Tezödə platformasından istifadə edərək parklanma haqqını asanlıqla onlayn ödəyə bilərsiniz. İlk 15 dəqiqəlik parklanma üçün ödəniş tələb olunmur.
• Xüsusi qayğıya ehtiyacı olan sərnişinlər üçün: Əgər xüsusi qayğıya ehtiyacınız varsa, uçuşdan ən azı 48 saat əvvəl aviaşirkətə məlumat verin ki, hava limanında və təyyarədə sizə lazımi dəstək təmin edilsin.

"Heydər Əliyev Beynəlxalq Aeroportunun bütün xidmətləri sərnişinlərin təhlükəsizliyini və rahatlığını təmin etmək üçün bu müddət ərzində gücləndirilmiş rejimdə fəaliyyət göstərəcək. Səyahətinizi vaxtında planlaşdıraraq rahatlığınızı təmin edin", - deyə müraciətdə qeyd olunub.

Azərbaycan və 125 digər ölkə Pakistana səfər etmək üçün pulsuz viza ala bilər.

"Operativ Məlumat Mərkəzi-OMM" xəbər verir ki, bu barədə "Visanews" məlumat yayıb.

Pakistanın informasiya naziri Ataulla Tarar bildirib ki, Azərbaycan da daxil olmaqla, 126 ölkədən gələn ziyarətçilər üçün elektron viza (e-Visa) rüsumlarından imtina ediləcək və müraciət prosesi əhəmiyyətli dərəcədə sadələşdiriləcək.

Qeyd edilib ki, bu ölkələrin vətəndaşlarına 90 günlük viza 24 saat ərzində həm turizm, həm də işgüzar məqsədlər üçün pulsuz veriləcək.

Sentyabrın 7-8-də Şamaxıda ənənəvi Üzüm və Şərab Festivalı keçiriləcək.

"Operativ Məlumat Mərkəzi-OMM" xəbər verir ki, Festival Dövlət Turizm Agentliyi və Şamaxı Rayon İcra Hakimiyyətinin təşkilatçılığı ilə Şamaxı rayonunun Meysəri kəndində baş tutacaq.

Festivala iTicket.az saytından qeydiyyatdan keçərək qoşulmaq olar. Ziyarətçilərin festival məkanına çatdırılması və geri dönməsi üçün Heydər Əliyev Mərkəzinin qarşından nəqliyyat da təşkil olunacaq. Artıq üçüncü dəfədir keçirilən festivalın məqsədi yerli üzüm və şərab istehsalının təşviqi, ölkəmizdə üzümçülük və şərab istehsalı tarixini, bu sahədə görülən işləri geniş ictimaiyyətə çatdırmaqdır.

“Şirvan şərabları” MMC-nin üzümçülük və şərabçılıq kompleksinin ərazisində təşkil olunacaq festivalda ziyarətçilər üzüm istehsalı və şərabçılıq, Azərbaycanın turizm potensialı ilə daha yaxından tanışlıq imkanı qazanacaq, müxtəlif əyləncə və şou proqramlar təqdim olunacaq. Festivalda yerli və xarici istehsalçıların şərab məhsullarının dequstasiyaları təşkil ediləcək, şərab evlərinin maraqlı hekayələrini izləmək imkanı yaradılacaq. Ölkəmizin ayrı-ayrı bölgələrindən olan üzüm emalı və şərab istehsalı zavodları çeşidli şərablarını nümayiş etdirəcək, ziyarətçilər bəyəndikləri məhsulları ən sərfəli qiymətə əldə edə biləcək.

Üzüm və Şərab Festivalı həm də şərab istehsalçılarına yeni işguzar əlaqələr qurmaq, məhsullarını geniş auditoriyaya tanıtmaq üçün gözəl fürsətdir. Azərbaycanda ənənəvi təşkil olunan Üzüm və Şərab Festivalı yerli sakinlər və turistlərin böyük marağına səbəb olur. Festivalın məkanı kimi Şamaxının seçilməsi də təsadüfi deyil. Şamaxı Azərbaycanın aparıcı aqrar rayonlarından biri olmaqla yanaşı, həm də ölkə şərabçılığının, üzüm istehsalının paytaxtı kimi tanınır. Azərbaycanda üzümçülüyün inkişafı ilə bağlı mühüm addımlar atılır, dövlət proqramları icra edilir. Üzüm və Şərab Festivalı kimi tədbirlər isə dövlətin bu istiqamətdəki siyasətinə önəmli dəstəklərdəndir.

Gürcüstanın turizm gəlirləri yanvar-iyun dövründə 5,2 faiz artaraq 1,9 milyard dollara çatıb.

"Operativ Məlumat Mərkəzi-OMM" xəbər verir ki, bu barədə Gürcüstan Milli Turizm Administrasiyası məlumat yayıb.

İlin birinci yarısının sonunda turizm ölkəyə pandemiyadan əvvəlki 2019-cu ilin eyni dövrü ilə müqayisədə 30,4% çox gəlir gətirib. O zaman gəlir 570 milyon dollar idi.

Gürcüstan büdcəsinə vəsait axını əsasən Aİ və Böyük Britaniyadan gələn turistlərin sayının artması hesabına artıb. Altı ay ərzində Gürcüstanın bu ölkələrdən gələn səyahətçilərdən əldə etdiyi gəlir 14% artaraq 246 milyon dollara çatıb.

Bu ilin yanvar-avqust aylarında Azərbaycandakı 3 ulduzlu hotellərdə onlayn bronlaşdırma sistemi olan booking.com üzrə bir gecə qalmaq üçün orta qiymət 82,7 manat təşkil edib.

 "Operativ Məlumat Mərkəzi-OMM" Dövlət Turizm Agentliyinin hesabatına istinadən xəbər verir ki, bu, ötən ilin eyni dövrü ilə müqayisədə 26,4 % çoxdur.

Hesabat dövründə ən yüksək qiymət 128,3 manat olmaqla Qubada qeydə alınıb. Bu, 1 il əvvələ nisbətən 21,5 % azdır.

İkinci yerdə 115,4 manat olmaqla Qəbələ qərarlaşıb. Bu, illik müqayisədə 71,2 % çoxdur.

3 ulduzlu hotellər arasında üçüncü yeri isə 115 manat olmaqla Şamaxı tutub. Bu rayonda ötən ilin eyni dövründə 3 ulduzlu hotel olmayıb

Naxçıvanda 3 ulduzlu hotellərdə bir gecə qalmaq üçün 100 manata (+ 11 %), Astarada 86,3 manata (ötən ilin eyni dövründə rayonda 3 ulduzlu hotel olmayıb), Lənkəranda 82,2 manata (-69,6 %), Bakıda 82,1 manata (+ 26,6 %), İsmayıllıda 75 manata (- 20,2 %), Gəncədə 73,1 manata (+ 40,5 %), Lerikdə 70 manata (ötən ilin eyni dövründə rayonda 3 ulduzlu hotel olmayıb), Şəkidə 68,8 manata (+ 11,5 %), Qusarda 65,8 manata (- 27,6 %), Naftalanda 50 manata ( qiymət dəyişməyib), Mingəçevirdə 47 manata (- 19,7 %), Qaxda 45 manata (- 17,7 %) , Oğuzda 40 manata (+ 11,1 %) başa gəlib.