OMM Redaksiyası
Azərbaycanlı MMA döyüşçüsü Vüqar Kərəmov karyerası, “Super RIZIN 5” turniri və UFC-yə keçid ehtimalı barədə danışıb. 34 yaşlı idmançı bildirib ki, ilk növbədə qarşıdakı döyüşündə qələbə qazanmalıdır: onun fikrincə, məğlubiyyət UFC-yə dəvət almağı çətinləşdirə bilər.
Kərəmovun sözlərinə görə, ilin sonunadək Yaponiyada keçiriləcək “Super RIZIN 5” turnirində döyüşmək barədə müqaviləsi var. Qarşılaşmanın dekabrın sonlarında keçirilməsi planlaşdırılır, lakin rəqib hələ müəyyənləşməyib.
Kəmər uğrunda döyüş planlaşdırılmır
Azərbaycanlı idmançı bu görüşün titul qarşılaşması olmayacağını qeyd edib. Turnirdə kəmər uğrunda yaponiyalı və qırğızıstanlı döyüşçülər üz-üzə gələcək. Kərəmov qalib gələrsə, növbəti mərhələdə titul uğrunda mübarizə aparmaq imkanı qazanacağını deyib.
O, “RIZIN”lə müqavilə başa çatdıqdan sonra müxtəlif təşkilatlardan gələcək təklifləri nəzərdən keçirəcəklərini bildirib. Kərəmov UFC ilə danışıqlar aparıldığını, bununla belə, “RIZIN”dən daha sərfəli təklif gələ biləcəyini də vurğulayıb. Döyüşçünün əsas arzusu UFC-də çıxış etməkdir.
Kərəmovun “RIZIN” karyerası
Qeyd edək ki, Kərəmov ötən ay “Super RIZIN 5” turnirində 66 kq çəki dərəcəsində yaponiyalı Ryo Takagi ilə döyüşüb və üç raundun sonunda hakimlərin yekdil qərarı ilə qalib gəlib. Hakimlər görüşü 29:28, 30:27 və 30:27 hesabları ilə onun xeyrinə qiymətləndiriblər.
Kərəmov 2023-cü ildə Mikuru Asakuranı məğlub edərək “RIZIN”də 66 kq çəki dərəcəsinin çempionu olub. Həmin il Çihiro Suzukiyə uduzaraq titulunu itirib.
