Venesuelada iyunun 24-də baş vermiş dağıdıcı zəlzələlərdən sonra təxminən 1,8 milyon insan, o cümlədən 680 minə yaxın uşaq humanitar yardıma ehtiyac duyur.
"Operativ Məlumat Mərkəzi-OMM" xəbər verir ki, bununla bağlı BMT-nin Uşaq Fondu (UNICEF) məlumat yayıb.
UNICEFin açıqlamasında qeyd olunub ki, təbii fəlakətdən zərər çəkən əhalinin böyük hissəsini uşaqlar təşkil edir.
Təşkilatın Venesueladakı nümayəndəsi Manuel Rodriges Pumarolun sözlərinə görə, ölkədə xəstəxanalar imkanlarının son həddində fəaliyyət göstərir, minlərlə uşaq təmiz içməli suya etibarlı çıxışdan məhrumdur, çoxsaylı məktəblər isə ciddi ziyan görüb.
Bildirilib ki, paytaxt Karakasda 432 məktəbə ziyan dəyib ki, bu da regiondakı bütün təhsil müəssisələrinin üçdə birindən çoxunu təşkil edir. Salamat qalan məktəblərin bir hissəsi isə evsiz qalmış ailələr üçün müvəqqəti sığınacaq kimi istifadə olunur.
Xatırladaq ki, iyunun 24-də Venesuelada iki güclü zəlzələ baş verib. ABŞ Geoloji Xidmətinin məlumatına görə, birinci zəlzələnin maqnitudası 7,2, ikinci zəlzələnin maqnitudası isə 7,5 olub. Bundan sonra 512 afterşok qeydə alınıb.
Venesuela hökumətinin son məlumatına əsasən, zəlzələlər nəticəsində həlak olanların sayı 1450-yə çatıb. Hazırda 3200-dən çox yaralı xəstəxanalarda müalicə alır. Təbii fəlakət nəticəsində çoxlu sayda yaşayış evi dağılıb, infrastruktur və xəstəxanalara ciddi ziyan dəyib, ölkənin əsas hava limanının fəaliyyəti isə dayandırılıb.
