OMM Redaksiyası
Şənbə günü Varşavadakı kollecdə bıçaqlı hücum nəticəsində üç nəfər xəsarət alıb. Polis sözçüsü Yakub Filipiak “Reuters”ə bildirib ki, polisə təhlükəli silahdan istifadə ilə bağlı məlumat saat 12:30-da daxil olub.
Yaralılardan biri həyati təhlükəsi olmayan xəsarətlərlə xəstəxanaya aparılıb, digər iki nəfərə isə xəstəxanada müalicə lazım olmayıb. Filipiakın sözlərinə görə, hücum edən şəxs kollecin 21 yaşlı tələbəsidir.
Polşanın dövlət xəbər agentliyi “PAP” zərərçəkənlərin 17 yaşlı iki qız və qeydiyyat sənədlərini təqdim etmək üçün kollecinə gələn 24 yaşlı qadın olduğunu yazıb. Agentliyin məlumatına əsasən, ilkin polis araşdırması hücum edən şəxslə zərərçəkənlərin bir-birini tanımadığını göstərib.
Polis məktəblərdə təhlükəsizlik tədbirlərini artırıb
Hadisə həftə ərzində məktəblərdə baş vermiş iki ayrı bıçaqlı hücumdan sonra qeydə alınıb. Cümə günü, oktyabrın 9-da, hücumlardan sonra mümkün yeni zorakılıqla bağlı narahatlığı azaltmaq üçün minlərlə polis əməkdaşı Polşadakı məktəblərə baş çəkib. Şənbə günkü hücumun bu narahatlığı artıracağı gözlənilir.
Polisin bildirdiyinə görə, cümə günündən etibarən təxminən 50 min obyekt yoxlanılıb, 76 nəfər saxlanılıb. Səlahiyyətli qurumlar daha əvvəl saxlanılanların əksəriyyətinin internetdə təhdidlər yazan yeniyetmələr olduğunu açıqlamışdı.
Həftə ərzində daha iki məktəb hücumu baş verib
Cümə axşamı Varşavanın şimal-şərqində yerləşən Leszczydol-Nowiny qəsəbəsindəki ibtidai məktəbdə dəbilqəsinə kamera quraşdırmış 15 yaşlı keçmiş şagird məktəbin nəzarətçisini öldürüb, iki müəllimi yaralayıb.
Bir gün əvvəl isə paytaxtın şimalındakı Ostroleka şəhərində məktəbdə 19 yaşlı şəxs 10 nəfəri, o cümlədən özünü yaralayıb.
Son hadisələr gənclər arasında zorakılıq və yeni hücumların baş verməsi ehtimalı ilə bağlı narahatlığı gücləndirib.
