Rumıniyanın şərqində, Ukrayna ilə sərhəddən təxminən 5 kilometr məsafədə yerləşən Lunkavitsa yaşayış məntəqəsi yaxınlığında naməlum mənşəli pilotsuz uçuş aparatı (PUA) qəzaya uğrayıb.
“Operativ Məlumat Mərkəzi – OMM” xəbər verir ki, Rumıniya Müdafiə Nazirliyinin məlumatına görə, PUA meşəlik əraziyə düşüb.
Hərbi qurumun açıqlamasında bildirilib ki, aparat çox aşağı hündürlükdə uçduğu üçün ölkənin radiolokasiya müşahidə sistemləri tərəfindən aşkar edilməyib.
Fövqəladə Hallar üzrə Rayon Müfəttişliyinin məlumatına görə, PUA-nın yerə çırpılması nəticəsində partlayış baş verib və daha sonra ərazidə yanğın qeydə alınıb.
İlkin məlumatlara əsasən, hadisə nəticəsində xəsarət alan olmayıb.
Qeyd edək ki, bu, Rumıniya ərazisində PUA qalıqlarının aşkarlandığı ilk hadisə deyil.
Ölkənin Müdafiə Nazirliyi daha əvvəl də ərazidə buna bənzər insidentlərin qeydə alındığını açıqlayıb.
