Daxili İşlər Nazirliyindən (DİN) verilən məlumata görə, Abşeron Rayon Polis İdarəsinin əməkdaşları tərəfindən həyata keçirilən əməliyyat tədbirləri nəticəsində narkotik vasitələrin qanunsuz dövriyyəsində şübhəli bilinən şəxs yaxalanıb.
Beynəlxalq yükdaşımalarla məşğul olan 47 yaşlı Emin Əhmədovun idarə etdiyi iritonnajlı yük avtomobilinə baxış zamanı 8 kq heroin və 3 kq-dan çox metamfetamin aşkarlanaraq götürülüb. İlkin araşdırmalarla müəyyən edilib ki, E.Əhmədov narkotik vasitələri İran vətəndaşından əldə edərək qaçaqmalçılıq yolu ilə ölkəyə gətirib.
Hazırda faktla bağlı araşdırmalar davam etdirilir, narkoşəbəkənin digər üzvlərinin müəyyən edilməsi istiqamətində zəruri tədbirlər görülür.
