ABŞ Prezidenti Donald Tramp Böyük Britaniya Kralı III Çarlz ilə görüşü zamanı diqqətçəkən addım atıb.
“Operativ Məlumat Mərkəzi-OMM” "Daily Mail" nəşrinə istinadən xəbər verir ki, o, monarxı salamlayarkən onun çiyninə toxunaraq kral protokolunun yazılmamış qaydalarını pozub.
Məlumata görə, kral ailəsi üzvləri ilə ilk olaraq fiziki təmas qurmaq qadağandır. Lakin Ağ Evdə baş tutan dövlət səfərinin ilk günündə bu qayda gözardı edilib. Yayılan kadrlarda Trampın əvvəlcə özünəməxsus möhkəm əl sıxma nümayiş etdirdiyi, ardınca isə kralın çiyninə toxunduğu aydın görünür.
Bədən dili üzrə ekspert Cudi Ceyms hesab edir ki, çiynə toxunmaq sadəcə salamlaşma deyil, həm də siyasi bir jest xarakteri daşıyır.
Qeyd edək ki, Böyük Britaniya monarxının 2007-ci ildən bəri həyata keçirdiyi bu ilk dövlət səfəri aprelin 30-dək davam edəcək.
