Türkiyənin vitse-prezidenti Fuat Oktay prezident və parlament seçkilərində iştirak edib.
"Operativ Məlumat Mərkəzi-OMM" xəbər verir ki, o, İstanbulda səs verib.
F.Oktay səsvermədən sonra jurnalistlərə açıqlamasında deyib ki, seçicilər səsvermədə fəal iştirak edirlər: “Bu tədbir bir növ demokratiya festivalıdır. Deyilməli olanlar artıq deyilib. İndi qərar xalqındır. Əlbəttə, hər birimiz nəticəyə hörmət edəcəyik”.
Vitse-prezident söyləyib ki, bütün dünya Türkiyədə seçki prosesini diqqətlə izləyir: “Dünyada Türkiyə qədər seçki prosesini şəffaf keçirən başqa ölkə, bəlkə də, yoxdur. Qərbdə seçkilərdə iştirak faizi adətən çox az olur. Bu mənada Türkiyədəki seçkilər həm də nümunədir. Seçkilərin nəticəsinin xeyirli olmasını arzu edirəm”.
Qeyd edək ki, bu gün Türkiyədə prezident və parlament seçkiləri keçirilir. Seçkilər üzrə 64 milyon 113 min 941 nəfər seçici qeydə alınıb. Bu gün ölkə daxilində 60 milyon 697 min 843 vətəndaş səs verəcək. Xaricdə yaşayan 3 milyon 416 min 98 seçicinin səsverməsi isə bir neçə gün əvvəl yekunlaşıb.
