Afət Ziyadqızı
Türkiyənin Mədəniyyət və Turizm naziri Mehmet Nuri Ersoy Diyarbəkir və Bingöldə təmiri tamamlanan altı tarixi məscidin yenidən ibadətə açılacağını açıqlayıb.
"Operativ Məlumat Mərkəzi-OMM" xəbər verir ki, Ersoy sosial şəbəkə hesabında 6 fevral zəlzələlərindən sonra Vəqflər Baş İdarəsinin bərpa etdiyi Diyarbəkirdəki Əli Paşa, Məlik Əhməd Paşa, Parlisafo, Cəfər-i Təyyar və Hanbaşı məscidləri, eləcə də Bingöldəki Balaban bəy məscidinin oktyabrın 2-də cümə namazı ilə ibadətə açılacağını bildirib.
Nazirin sözlərinə görə, zəlzələ nəticəsində yaranmış zədələr elmi araşdırmalar əsasında aradan qaldırılıb və tikililər möhkəmləndirilib. Bərpa zamanı daş işləmələri, çini, taxta elementlər və naxışlar qorunaraq abidələrin ilkin memarlıq xüsusiyyətlərinin saxlanılmasına xüsusi diqqət yetirilib.
Altı məscidin birgə açılış mərasimi Diyarbəkirin Sur rayonundakı Əli Paşa məscidində təşkil olunacaq. XVI əsrdə Hədim Əli Paşa tərəfindən tikdirilən bu məsciddə uyğun olmayan beton örtük və tirlər sökülərək dam örtüyü Diyarbəkirin ənənəvi dam quruluşuna uyğun yenilənib, taxta minbər və çinilər bərpa edilib.
XV əsrə aid Parlisafo məscidinin zəlzələdə ciddi zərər görmüş minarəsi polad halqalar və gərmə elementləri ilə möhkəmləndirilib. Həmçinin Cəfər-i Təyyar, Hanbaşı və 1587–1591-ci illərdə inşa edilmiş Məlik Əhməd Paşa məscidlərində də analoji təmir, inyeksiya və bünövrə möhkəmləndirmə işləri başa çatdırılıb.
Bingöldə yerləşən və Ağqoyunlu dövründən qalan Balaban bəy məscidinin isə zərər görmüş minarəsi nəzarətli şəkildə sökülərək ənənəvi tikinti üsullarına uyğun yenidən inşa edilib, elektrik və mexaniki sistemləri daxil olmaqla bütün memarlıq bütövlüyü bərpa olunub.
