Afət Ziyadqızı
Türkiyənin Şanlıurfa vilayətinin Karaköprü rayonunda 5,4 maqnitudalı zəlzələ qeydə alınıb. Təbii Fəlakət və Fövqəladə Halların İdarə Olunması Agentliyinin (AFAD) məlumatına görə, yeraltı təkan yerin 7,39 kilometr dərinliyində yerləşib və Şanlıurfa ilə yanaşı, ətraf vilayətlərdə də aydın hiss olunub.
“Operativ Məlumat Mərkəzi-OMM” xəbər verir ki, bu barədə Türkiyə seysmoloji xidmətləri və ekspertləri məlumat yayıb.
Zəlzələni şərh edən seysmoloq, professor Şükrü Ersoyun sözlərinə görə, bölgə Şərqi Anadolu fay xəttindən müəyyən qədər uzaqda yerləşsə də, ərazidə seysmik aktivlik yarada biləcək lokal qırılmalar mövcuddur. Atatürk su anbarının qərbində şimal-qərb–cənub-şərq istiqamətində uzanan Bozova qırılması belə strukturlardandır.
Ekspert bildirib ki, qırılmanın uzunluğu bölgədə 6 maqnitudaya yaxın zəlzələlərin potensial olaraq baş verməsinə imkan verir. Professor 5,4 maqnitudalı təkanın kiçik qiymətləndirilməməli olduğunu vurgulayaraq, xüsusilə kənd yerlərində və mühəndislik standartlarına cavab verməyən tikililərdə zədələnmələrin yaranması riskini qeyd edib.
Hadisənin dayaz ocaqlı olduğunu bildirən Şükrü Ersoy vurğulayıb ki, əgər bu hadisə müstəqil zəlzələdirsə, sonrakı təkanların gücü tədricən azalmalıdır. Belə hallarda 4 maqnitudaya çatan afterşokların baş verməsi gözləniləndir. Seysmoloq bölgədə daha böyük zəlzələnin olacağını dəqiq proqnozlaşdırmağın imkansızlığını qeyd edərək, bundan sonra afterşokların yayılma istiqamətinin izlənilməsinin vacibliyini bildirib.
Professor Ersoy Şanlıurfadakı zəlzələnin 6 fevral 2023-cü il fəlakətinin birbaşa davamı olmadığını bəyan edib. Həmin zəlzələlərin Şərqi Anadolu qırılması üzərində gərginlik yaratdığını deyən ekspert, uzaq ərazilərdəki qırılmaların öz seysmik xüsusiyyətləri ilə aktivləşdiyini xatırladıb. O, Türkiyənin seysmik zona olduğunu və xəritələrdə görünməyən gizli qırılmaların da hər an aktivləşə biləcəyini diqqətə çatdırıb.
