Türkiyədə müxtəlif ağır cinayətlərə görə 43 il 3 ay 10 gün müddətinə azadlıqdan məhrumetmə cəzasına məhkum edilmiş Azərbaycan vətəndaşı İğdır vilayətində tutulub.
"Operativ Məlumat Mərkəzi-OMM" xəbər verir ki, bu barədə Türkiyə mətbuatı xəbər yayıb.
Bildirilib ki, 53 yaşlı N.S. insan alveri, eləcə də şəxsi fahişəliyə təşviq etmə, bu fəaliyyətə məcbur etmə, vasitəçilik və yer təmin etmə kimi cinayətlərdə təqsirli bilinib. Məhkəmənin qərarı ilə ona 43 il 3 ay 10 gün həbs cəzası ilə yanaşı, 12 min 480 türk lirəsi (təxminən 487 manat) məbləğində pul cəriməsi də təyin olunub.
Məlumata əsasən, N.S. İğdır–Naxçıvan avtomobil yolu üzərində keçirilən qəfil yoxlama zamanı şübhə doğuran nəqliyyat vasitəsində aşkar edilərək saxlanılıb.
İstintaq və əməliyyat tədbirləri başa çatdıqdan sonra saxlanılan şəxs tutularaq cəzaçəkmə müəssisəsinə təhvil verilib.
