Afət Ziyadqızı
Türkiyənin Kocaeli vilayətində aramsız yağan kütləvi leysan yağışları xüsusilə Başiskele rayonunda gündəlik həyatı və nəqliyyatın hərəkətini iflic edib.
"Operativ Məlumat Mərkəzi-OMM" xəbər verir ki, rayon ərazisindəki çayların məcrasından çıxaraq daşması nəticəsində sahil zolağında, eləcə də Yeşilyurt və Seymen məhəllələrində çoxsaylı yaşayış evlərini və ticarət obyektlərini su basıb. Ərazidəki küçə və prospektlər su altında qalıb.
Təbii fəlakət nəticəsində strateji əhəmiyyətli D-130 avtomobil magistralında iri su yığınları əmələ gəlib, bu da nəqliyyat vasitələrinin təhlükəsiz hərəkətini ciddi şəkildə məhdudlaşdırıb.
Güclü yağışların təsirinə məruz qalan Gebze və Dilovası rayonlarının da bir sıras küçə və prospektlərində subasmalar və analoji fəsadlar qeydə alınıb. Hadisə yerlərinə bələdiyyə və mülki müdafiə qüvvələrinin xüsusi texnikaları cəlb olunaraq suyun təxliyəsi işləri davam etdirilir.
