ABŞ Prezidenti Donald Tramp Ağ Evdə keçirdiyi mətbuat konfransında İran ilə aparılan danışıqlar prosesinə dair mühüm açıqlamalar verib.
"Operativ Məlumat Mərkəzi-OMM" xəbər verir ki, o, rəsmi Tehranla razılıq əldə olunmayacağı təqdirdə vəziyyətin daha da ağırlaşacağına işarə edib.
Donald Tramp qeyd edib ki, tərəflər arasında mütləq saziş imzalanmalıdır: "Biz İran ilə razılığa gəlməliyik, əks halda bu, çox travmatik olacaq. Mən bunun baş verməsini istəmirəm, lakin onlarla bir anlaşma əldə etməyimiz şərtdir".
İsrailin Baş naziri Binyamin Netanyahu ilə məsələni bütün tərəfləri ilə müzakirə etdiyini deyən ABŞ lideri, son sözün özünə aid olduğunu vurğulayıb.
Mümkün sazişin ABŞ üçün ədalətli və qazanclı olmasının vacibliyini qeyd edən Tramp, əks ssenaridə tətbiq olunacaq planlardan danışıb:
"Razılaşma əldə olunmasa, "ikinci mərhələ"yə keçid ediləcək. Bu mərhələ İran üçün olduqca çətin və ağır keçəcək. Danışıqlar üçün konkret vaxt məhdudiyyəti yoxdur".
Sonda Donald Tramp dialoqun gələn ay da davam edə biləcəyini və prosesin tamamilə onun nəzarətində olduğunu bildirib.
Qeyd edək ki, gərginliyin artdığı bir vaxtda ABŞ bölgəyə təyyarədaşıyan gəmi qrupu göndərmək qərarına gəlib.
